Shkroi: Fatbardh Dema
Një video-material është publikuar në Facebook nga faqja “Forcat e Kosovës”, në të cilin shfaqen pamje të një personi duke folur në gjuhën serbe, si dhe pjesëtarë të forcave të armatosura serbe duke kryer stërvitje.
Përmes këtij video-materiali, faqja e lartcekur pretendon se personi që flet në video ka deklaruar se “ushtarët nuk janë duke ushtruar kot, por kan qëllim pushtimin e Kosovës”. Ndërsa protagonistit të kësaj videoje i referohet si “një ‘komandant’ i xhandarmërisë serbe”.
Çka nuk shkon me këtë pretendim?
Pas verifikimit të fakteve të kryer nga hibrid.info, u vërtetua se personi që flet në video është gazetar i kronikës së zezë në median në gjuhën serbe “TV Pink”, Mladen Mijatoviq.
Hibrid.info ka përkthyer deklarimin e gazetarit Mijatoviq, e që u vërtetua se në asnjë rast ai nuk ka përmendur Kosovën, siç pretendohet rrejshëm nga faqja “Forcat e Kosovës”.
Deklarimi i Mijatoviqit, i përkthyer në shqip:
“Pjesëtarë të Kompanisë Specialiste të Xhandarmërisë po kryejnë një ushtrim jashtëzakonisht të vështirë dhe të rrezikshëm në llogore. Hapësirat janë të ngushta, të paarritshme dhe plot me baltë, dhe pjesëtarët e Xhandarmërisë po përdorin municion luftarak. Ky është një nga ushtrimet më sfiduese dhe më të vështira, por të gjitha ushtrimet e tilla kontribuojnë në punë të sigurt dhe në zbatimin e të gjitha detyrave të caktuara në kushte reale”.
Pas kërkimit përmes programit të automatizuar “InVID”, u gjet edhe videoja autentike e publikuar nga vetë gazetari serb në llogarinë e tij zyrtare në Instagram, tre ditë më parë (6 dhjetor).
Në përshkrimin e kësaj videoje thuhet “në llogore me pjesëtarë të Kompanisë Specialiste të Xhandarmërisë duke përdorur municion të vërtetë gjatë stërvitjes”. (shih këtu)
Hibrid.info e trajtoi këtë përmbajtje, pasi e njëjta deri në shkrimin e këtij artikulli ka arritur të grumbullojë gjithsej 432 reagime, 280 komente dhe 45 shpërndarje. (shih fotografinë më poshtë)
Analiza:
Përmes një videoje të publikuar në Facebook, pretendohet se një “komandant i xhandarmërisë serbe” ka deklaruar se stërvitjet e ushtrisë serbe kanë për qëllim “pushtimin e Kosovës”.
Hibrid.info verifikoi faktet dhe vërtetoi se ky pretendim është i rremë.
Personi në video është gazetar serb i kronikës së zezë në “TV Pink”, Mladen Mijatoviq, jo komandant i xhandarmërisë, siç pretendohet.
Në këtë video ai flet vetëm për një stërvitje të vështirë me municion të vërtetë që po kryejnë pjesëtarët e Xhandarmërisë serbe, pa përmendur fare Kosovën.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.