Portali i dyshimtë “specialja.com” ka publikuar një artikull me titull “Aksident shumë i rëndë tek Mensa e Studentëve në Prishtinë”.
Pas verifikimit të fakteve nga hibrid.info, del që titulli i këtij artikulli është i sajuar, i cili nuk përputhet në asnjë rast me përmbajtjen në tekst.
Lajmi ka të bëjë me njoftimin e Ministrisë së Arsimit, Shkencës, Teknologjisë dhe Inovacionit, për mbajtjen e Testit të Arritshmërisë për klasët e 9-ta. Pra, nuk ka ndodhur asnjë aksident siç pretendohet rrejshëm në titullin e këtij artikulli.
Teksti i artikullit të publikuar në “specialja.com”:
Ministria e Arsimit, Shkencës, Teknologjisë dhe Inovacionit (MASHTI) ka njoftuar nxënësit e klasave të 9-ta se të premten, më 28 maj, do të mbahet Testi i Arritshmërisë.
Sipas njoftimit të MASHTI-it, për shkak se është kohë pandemie, forma e organizimit të sistemimit të nxënësve në klasë, duhet të realizohet një nxënës në një bankë kurse në çdo klasë do të lejohen vetëm nga 15 nxënës. / Pak sekonda pasi ta hapësh marketingun shih PAMJET
Vegëza e artikullit të publikuar në “specialja.com”:
Më poshtë mund të gjeni njoftimin e MASHTI-t, rreth mbajtjes së Testit të Arritshmërisë për klasët e 9-ta.
https://www.facebook.com/MASHTI.rks/posts/1758687241001769
Analiza:
Portali i dyshimtë “specialja.com” ka marrë njoftimin e MASHTI-t për mbajtjen e Testit të Arritshmërisë për klasët e 9-ta, duke i vendosur titull të rremë që gjoja ka ndodhur një aksident shumë i rëndë në Prishtinë.
Me këtë titull të rremë, ky portal i dyshimtë dezinformon lexuesit, duke i nxitur ata të klikojnë në artikull.
Pas analizës së kontrollit të fakteve të kryer nga hibrid.info, ky artikull merr vlerësimin si “clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
