Shkroi: Fatbardh Dema
U publikua një postim me pretendimin se në Kosovë çmimi i bukës është rritur në 70 cent.
Ky pretendim është publikuar të hënën (22 shtator) në Facebook nga faqja “Kosova e Re”.
E vërteta?
Pas hulumtimit të kryer online, hibrid.info vërtetoi se pretendimi është i pasaktë. Fotografia në fjalë është shkëputur nga një video e publikuar më herët, në prill 2025, e realizuar brenda një furre në Gjakovë.
Hibrid.info ka kërkuar në Google me fjalët kyçe “Rritet çmimi i bukës në Kosovë”, e që rezultatet tregojnë se muajt e fundit nuk ka raportime në media kredibile lidhur me këtë çështje. (shih këtu)
Pas verifikimit të fotografisë që shfaqet në postimin e lartcekur, u gjet se e njëjta është shkëputur nga një video e muajit prill, e realizuar nga TV Syri Vizion. Në këtë video-material ishte raportuar për rritjen e çmimit të bukës në Gjakovë. (shih këtu)
Analiza:
Një postim në Facebook nga faqja “Kosova e Re” pretendoi se çmimi i bukës në Kosovë është rritur në 70 cent. Pas verifikimit, hibrid.info konstatoi se ky pretendim është i pasaktë.
Fotografia e përdorur është marrë nga një video e prillit 2025 e TV Syri Vizion, që raportonte për rritjen e çmimit të bukës vetëm në Gjakovë, ndërsa nuk ka raportime nga media kredibile për një rritje të tillë në nivel vendi.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.