Portali informativ në gjuhën shqipe “Sot.com.al” kanë publikuar me datë 5 gusht një artikull me titull “Defekt i qëllimshëm? Shpëton për “fije të perit” kryeministri shqiptar, makinës nuk i funksionuan…”.
Pas verifikimit të fakteve, hibrid.info ka vërtetuar se titulli i këtij artikulli nuk është i saktë, pasi në përmbajtje qartësohet se bëhet fjalë për një incident ku u përfshi vetura e kryeministrit në detyrë të Malit të Zi, Dritan Abazoviq.
Me anë të këtij titulli, lë të kuptohet se bëhet fjalë për Edi Ramën, për shkak se si kryeministër shqiptar njihet vetëm Rama bazuar në konceptin e shtetit komb.
Gjithashtu, as me anë të fotografisë nuk qartësohet se për cilin kryeministër bëhet fjalë.
Vegëzat e artikullit të publikuar në portalin “Sot.com.al”:
Duke qenë se në titull pretendohet se personalitetit që i ndodhi incidenti me makinw është kryeministri shqiptar, kjo lë të kuptohet se bëhet fjalë për kryeministrin e Shqipërisë, hibrid.info ka bërë një hulumtim rreth sqarimit të konceptit komb-shtet, që i jep shpjegim dyshimit të ngritur përmes titullit të këtij artikulli.
Koncepti komb, sipas mënyrës që janë formuar kombet evropiane, pas Revolucionit Francez (1789), është njëjtë me shtetin. Autor të shumtë e përshkruajnë këtë ngjashmëri të kombit me shtetin, sipas konceptit evropian. Hibrid.info ka gjetur një përshkrim të studiuesit suedezo-zviceran Lars-Erik Cederman rreth ngjashmërisë së kombit, ku thotë se “Një shtet kombëtar është një njësi politike ku shteti dhe kombi janë në përputhje” (shih këtu)
Në bazë të këtij përkufizimi “Kur shteti dhe kombi përkojnë territorialisht dhe demografikisht, njësia që rezulton është një shtet-komb”, i bie që Dritan Abazoviq të jetë i kombësisë malazeze, por i etnisë shqiptare.
Kjo nënkupton që Dritan Abazoviq është kryeministër malazez (në detyrë) ose i Malit të Zi dhe përfaqëson interesat e kombit malazez, përkundër faktit që është me etni shqiptare. (shih këtu)
Për më tepër, si “kryeministër shqiptar” në bazë të përkufizimit “shtet komb” njihet vetëm kryeministri i Shqipërisë, Edi Rama. (shih këtu)
Analiza:
Portali “Sot.com.al” ka publikuar një artikull lidhur me incidentin në veturën e kryeministrit në detyrë të Malit të Zi, Dritan Abazoviq, mirëpo, në titull të artikullit ju referuan Abazoviqit si kryeministër shqiptar.
Në përkufizimin “shtet komb” i bie që Abazoviq të jetë kryeministër malazaez, ndërsa si kryeministër shqiptar njihet vetëm ai i Shqipërisë, Edi Rama.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.