Shkroi: Fatbardh Dema
Pretendohet se presidenti francez, Emmanuel Macron ka thënë se trupat franceze të KFOR-it mund të tërhiqen nëse Kosova insiston ta hapë Urën e Ibrit.
Ky pretendim u publikua dje (11 gusht) në Facebook nga faqja “MeKryeministrin”.
Cila është e vërteta?
Pas verifikimit të fakteve të kryer nga hibrid.info, u vërtetua se ky pretendim i bërë nga faqja “MeKryeministrin”, është i rremë.
Vegëza e postimit të publikuar në Facebook nga faqja “MeKryeministrin”:
Çka tha Qeveria franceze pas synimeve të Qeverisë së Kosovës për rihapjen e urës mbi Ibër?
Franca dënon fuqishëm rritjen e veprimeve të njëanshme të autoriteteve të Kosovës në veri të vendit që ndikojnë në jetën e përditshme të komunitetit serb. Këto veprime rrezikojnë përpjekjet për normalizimin e marrëdhënieve me Serbinë, të cilat janë parakushte për anëtarësimin e ardhshëm të dy vendeve në BE.
Franca u bën thirrje autoriteteve të Kosovës që të përmbahen nga çdo veprim i njëanshëm i ardhshëm që do të përkeqësonte më tej tensionet. Ai inkurajon dy palët që të kthehen në tryezën e bisedimeve nën kujdesin e Bashkimit Evropian në mënyrë që të bëjnë përparim drejt zbatimit të marrëveshjes së Ohrit. (shih këtu)
Pra, në asnjë rast nuk është përmendur mundësia e tërheqjes së trupave franceze nga KFOR-i, siç pretendohet në postimin e faqes “MeKryeministrin” në Facebook.
Në postimin e faqes së lartcekur, thuhet se ministri i Jashtëm turk, Hakan Fidan, i ka replikuar deklaratës së Francës, duke thënë se nëse shteti francez tërheq trupat nga KFOR-i në Kosovë, kjo nuk do të prishë punë dhe se Kosova e ka përkrahjen e Turqisë në vendimet për ruajtjen e territorit të Kosovës.
Hibrid.info ka hulumtuar online në lidhje me këtë pretendim, por një deklaratë e tillë nuk është gjetur e publikuar nga Ministria e Jashtme e Turqisë. (shih këtu)
Po ashtu, as në llogarinë zyrtare të ministrit turk në X (ish-Twitter) nuk gjendet një deklaratë e tillë. (shih këtu)
Analiza:
Pretendimi se presidenti francez, Emmanuel Macron ka deklaruar se Franca do t’i tërheqë pjesëtarët e saj të KFOR-it nga Kosova, në rast se Qeveria e Kosovës insiston ta hapë Urën e Ibrit.
Hibrid.info pas hulumtimit të kryer, ka vërtetuar se ky pretendim është i rremë. Një deklaratë e tillë nuk është bërë nga presidenti Macron.
Po ashtu, në postimin e bërë në Facebook nga faqja “MeKryeministrin”, u pretendua se gjoja për këtë deklaratë të Macronit, ka reaguar ministri i Jashtëm turk Hakan Fidan.
Hibrid.info ka vërtetuar se Ministria e Jashtme e Turqisë nuk ka dalë me ndonjë reagim në lidhje me insistimin e Kosovës për të hapur Urën e Ibrit.
Bazuar në metodologjinë e punës, hibrid.info e vlerëson këtë postim si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
