Portali informativ “Paparaci.com” ka publikuar sot (12 shtator) një artikull me titull “Zhgënjejnë futbollistët nga diaspora, Ademi kthen sytë kah vendorët: ‘Janë e ardhmja’”.
Në fotografinë e bashkangjitur në këtë artikull shihet kryetari i Federatës së Futbollit të Kosovës, Agim Ademi, së bashku me pesë futbollistë që janë pjesë e përfaqësueses së Kosovës.
Megjithatë, në përmbajtje të artikullit, autori pretendon se “pas mosarritjes së suksesit me futbollistë nga diaspora, të rritur në futbollin evropian, FFK-ja i ka kthyer sytë komplet kah produktet vendore”.
Gjithashtu, në përmbajtje thuhet se futbollistët që shihen në fotografi janë “të gjithë emra të formuar në Kosovë”.
Pas verifikimit të fakteve të kryer nga hibrid.info, është vërtetuar se njëri nga futbollistët që shihet në imazh, Altin Zeqiri, është i lindur në Finlandë dhe se asnjëherë në karrierën e tij nuk ka qenë pjesë e ndonjë klubi futbollistik në vendin tonë.
Vegëza e artikullit të publikuar në portalin “Paparaci.com”:
Pjesë nga artikulli i publikuar në portalin “Paparaci.com”:
Pas mosarritjes së suksesit me futbollistë nga diaspora, të rritur në futbollin evropian, FFK-ja i ka kthyer sytë komplet kah produktet vendore. Kështu dëshmon një fotografi e Agim Ademit në shoqërinë e futbollistëve të rinj të dalë nga futbolli vendor.
Në mbishkrimin e fotografisë, në të cilën ndodhen pesë futbollistë të nxjerrë nga shkollat kosovare të futbollit, Ademi thekson se të rinjtë janë gati për të shkëlqyer në skenën ndërkombëtare.
Në fotografinë e publikuar nga Ademi ndodhen Ermal Krasniqi, Albion Rrahmani, Meriton Korenica, Visar Bekaj dhe Altin Zeqiri. Të gjithë emra të formuar në Kosovë.
Në enciklopedinë falas në internet, Wikipedia, thuhet se Altin Zeqiri është i lindur në Finlandë, si dhe si futbollistë ka qenë pjesë e klubeve finlandeze si Espoo dhe Lahti, ndërsa aktualisht luan në klubin turk Çaykur Rizespor. (shih këtu)
Gjithashtu edhe në platformën online “Transfermarkt” vërehet se ai nuk ka qenë pjesë e ndonjë klubi të futbollit në Kosovë. (shih këtu)
Analiza:
Portali “Paparaci.com” ka pretenduar pasaktë se futbollisti kosovar Altin Zeqiri është emër i formuar në futbollin kosovar.
Megjithatë, par verifikimit të fakteve, hibrid.info ka vërtetuar se Zeqiri asnjëherë nuk ka qenë pjesë e ndonjë klubi futbollistin në Kosovë.
Bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
