Faqja në Facebook me emrin “Gazeta Aktuale” ka publikuar dje (28 gusht) një imazh të Dua Lipës, këngëtares së famshme nga Kosova.
Në imazh shihet këngëtarja shqiptare me flamurin kombëtar shqiptar në duar, ndërsa në mbishkrimin e fotografisë së publikuar shkruan “Dua Lipa: Secili njeh flamurin e armikut”.
Megjithatë, hibrid.info edhe pas hulumtimit, nuk ka arritur të gjejë fakte se një deklarim i tillë ka ardhur nga Dua Lipa.
Vegëza e postimit të publikuar nga “Gazeta Aktuale”:
I njëjti pretendim është publikuar edhe nga faqja në Facebook me emrin “Portali Alt”. (shih këtu)
Hibrid.info ka kontrolluar në profilet zyrtare të këngëtares në mediat sociale, Facebook dhe Instagram, por që në to nuk është gjetur deklarimi i pretenduar nga faqet e lart-cekura. (shih këtu dhe këtu)
Po ashtu edhe në ueb-faqen e këngëtares shqiptare, hibrid.info nuk ka gjetur diçka të tillë të pretenduar. (shih këtu)
Ndërsa edhe në kërkimin e bërë nga hibrid.info nëpërmjet makinës së kërkimit “Google”, rezultatet e kërkimit nuk shfaqin prova që mbështesin deklarimin e pretenduar të Dua Lipës, nga “Gazeta Aktuale”. (shih këtu)
Analiza:
Disa Faqe në Facebook kanë publikuar imazhin e Dua Lipës me mbishkrimin që pretendon se këngëtarja shqiptare është deklaruar se secili e njeh flamurin e armikut.
Por që hibrid.info ka hulumtuar dhe nuk ka gjetur fakte dhe dëshmi të besueshme, se një deklaratë e tillë ka ardhur nga këngëtarja.
Andaj edhe bazuar në metodologjinë e punës, hibrid.info e vlerëson publikimin si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
