Shkroi: Etrit Rexhepi
Është gjetur i publikuar një imazh, që shfaq pamjet e një proteste, ku në pankartën e protestuesve, shihet portreti i ish-presidentit, Hashim Thaçi, me mbishkrimin “Kush eshte kunder gjykates eshte kunder Kosoves”.
Kjo fotografi është publikuar në TikTok, më 6 janar nga llogaria me emrin “albinkurti.official”.
Çka nuk shkon me fotografinë?
Mbishkrimi në pankartën e fotografisë së paraqitur, është i manipuluar.
Vegëza e imazhit të publikuar në TikTok nga llogaria me emrin “albinkurti.official”:
Pas kontrollit me anë të programit të automatizuar të kërkimit “InVid”, hibrid.info ka gjetur se imazhi është marrë nga një protestë e 24 dhjetorit të vitit 2022 në Kosovë, e organizuar nga Partia SocialDemokrate (PSD), kundër dënimit të Sali Mustafës nga Gjykata Speciale (shih këtu)
Hibrid.info ka verifikuar pamjet dhe ka gjetur se parulla që e shoqëronte protestën ishte “Jo në emrin tim”.
Hibrid.info nuk ka gjetur imazhin origjinal, por bazuar në personat që shihet teksa mbajnë pankartën, janë gjetur fotografi të tjera nga kjo protestë që dëshmojnë se pankarta që mbanin ata në duar, shfaqte parullën e protestës, “Jo në emrin tim”. (shih këtu)
Që do të thotë se autori i publikimit, ka ndërhyrë në aspektin vizual të fotografisë autentike. (shih fotografinë më poshtë)
Screenshot nga video-materiali i publikuar në kanalin e televizionit TopChannel në Youtube
Krahasimi i fotografive ku shihen disa prej personave të njëjtë në protestë
Analiza:
Fotografia që shfaq protestën ku protestuesit mbajnë në duar pankartën me portretin e ish-presidentit, Hashim Thaçi dhe me mbishkrimin “Kush eshte kunder gjykates eshte kunder Kosoves”, është e manipuluar.
Imazhi autentik tregon se protestuesit në fakt mbanin pankartë me mbishkrimin, “Jo në emrin tim”.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.