Shkroi: Etrit Rexhepi
Është publikuar një video-material me pretendimin se Richard Grenell, i dërguar special i presidentit Donald Trump, ka publikuar në instagram një fotografi të Hashim Thaçit dhe Kadri Veselit, ish-krerëve institucional të vendit.
Ky pretendim është publikuar dje (2 shkurt) në TikTok nga një llogari me emrin “newsilir”.
A është i vërtetë pretendimi?
Hibrid.info ka gjetur se pretendimi është i saktë, por lajmi për publikim e kësaj fotografie nga Grenell, nuk është aktual.
Hibrid.info ka hulumtuar në llogarinë e Grenell në Instagram dhe nuk ka gjetur ndonjë postim të fundit, ashtu siç është pretenduar.
Kërkimet e hibrid.info kanë gjetur se fotografia e ilustruar në këtë përmbajtje, është publikuar nga Grenell, më 23 qershor të vitit 2023.
Pse mund të lexohet si aktual ky pretendim?
Në fotografi mungon koha e publikimit të këtij postimi.
Gjithashtu, vërehet se edhe mbishkrimi që paraqet lajmin, është shkruar në kohën e tashme të mënyrës dëftore, të cilat zakonisht përdoren në gjuhën e gazetarisë informative.
Ndërsa, në të njëjtin video janë përmendur edhe shkrimi i Grenell në llogarinë e tij, i publikuar mw 30 janar, 2025, në platformën “X” (ish-Twitter), ku tregon se ka dëshmuar përpara jurisë së Jack Smith, ish-kryeprokurorit të Hagës dhe gjithashtu theksohet edhe angazhimi i Grenell, që arriti lirimin e gjashtë të burgosurve amerikanë në Venezuela (1 shkurt, 2025) (shih këtu).
Të dy këto ngjarje të ndodhura së fundmi, janë renditur në strukturë ta lajmit, pas temës për publikimin e fotografisë së Grenell.
Në bazë të strukturës së lajmit në Gazetari, ku baza e lajmit shkon në krye e ato me pak peshë në fund të lajmi, mund të vlerësohet se lajmi për publikimin e këtij imazhi nga Grenell, mund të lexohet si aktual.
Analiza:
Pretendimi për publikimin e fotografisë së Richard Grenell, ku shfaqen Thaçi e Veseli, është i saktë.
Por, Grenell ka publikuar imazhin në llogarinë e tij në Instagram në vitin 2023. Hibrid.info ka vlerësuar se me anë të këtij publikim, ka pasur përpjekje që postimi i Grenell në Instagram, të paraqitet si aktual.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.