Medium në gjuhën serbe “srbijadanas.rs” ka publikuar sot një artikull me pretendimin në titull se Ambasadori i Shteteve të Bashkuara të Amerikës (SHBA) në Kosovë, Jeffrey Hovenier ka thënë qartë që Serbia nuk është e detyruar ta heqë Kosovën nga kushtetuta.
Artikulli i publikuar në mediumin në gjuhën serbe mbanë titullin “AMBASADORI AMERIKAN NË PRISHTINË E KA THËNË QARTË: Serbia nuk është e detyruar ta heqë Kosovën nga Kushtetuta”.
Pas verifikimit të fakteve hibrid.info ka gjetur se pretendimi i mediumit serb është keqinterpretim i deklaratës e ambasadorit amerikan, pasi ai nuk e ka thënë decitivisht atë që pretendohet në artikull.
Vegëza e artikullit të publikuar në mediumin në gjuhën serbe “srbijadanas.rs”:
https://www.sd.rs/vesti/kosovo/kosovo-pristina-srbija-ambasador-2023-03-16
Pjesë të artikullit të publikuar në mediumin në gjuhën serbe “srbijadanas.rs”:
Ambasadori i SHBA-së në Prishtinë, Geoffrey Hovenier, ka bërë të ditur se propozimi evropian për normalizimin nuk përmend në asnjërën nga 11 pikat se Serbia është e detyruar të heqë Kosovën dhe Metohinë nga Kushtetuta e saj.
– Nuk kam parë se kjo çështje është ngritur përmes 11 pikave të propozimit evropian, kështu që nuk besoj se është një element specifik i bisedimeve aktuale – tha Hovenier, transmeton ATV.
Përkundër faktit që deklarata e ambasadorit amerikan citohet në përmbajtje të artikullit, interpretimi i kësaj deklarate është i pasaktë.
Në një intervistë për kanalin televiziv në gjuhën shqipe ATV, në pyetjen nëse Serbia “do të jetë ajo e detyruar ta largojë Kosovën nga kushtetuta e saj?”, Hovenier përgjigjet:
“Kjo është një pyetje e vështirë. Ju keni parë tekstin me njëmbëdhjetë pikat, apo njëmbëdhjetë nenet për të cilat ka pasur pajtim, ashtu siç kam parë edhe unë, unë nuk kam parë ndonjë adresim të kësaj çështjeje në këto 11 pika, andaj nuk besoj se ai ka qenë një element specifik i bisedimeve aktualisht”. (këtu)
Pra, ambasadori Hovenier nuk e thotë se Serbia nuk është e detyruar ta heqë nenin e Kushtetutës që konsideron Kosovën si pjesë brenda integritetit territorial, siç pretendohet përmes titullit të artikullit të “srbijadanas.rs”.
Analiza:
Mediumi në gjuhën serbe “srbijadanas.rs” ka pretenduar se ambasadori amerikan në Prishtinë, Jeffrey Hovenier, ka thënë qartë se Serbia nuk është e detyruar ta heqë Kosovën nga kushtetuta e saj.
Pretendimi i mediumit serb është interpretim i deklaratës e ambasadorit amerikan.
Në fakt, ambasadori Hovenier është shprehur se në 11 pikat e prezantuara nuk ka pasur adresim të kësaj çështjeje, dhe nuk beson se kjo çështje ka qenë element specifik i bisedimeve tani për tani.
Bazuar në metodologjinë e punës, hibrid.info këto pretendime e vlerëson si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
