Shkroi: Etrit Rexhepi
Një llogari me emrin “Fleta Press” ka publikuar (30 mars) një imazh në Facebook, ku shfaqet nënkryetarja e Partisë Demokratike të Kosovës, Vlora Çitaku në hyrje të një objekti fetar ortodoks.
Autori i këtij publikimi i ka vendosur mbishkrimin “Sekretarja e PDK-së znj.Vlora Çitaku ishte për vizitë në Manastirin e Deçanit,si duket ishte për tja uruar tokën që Kushtetusja ja dha Manastirit , 24 hektar!”.
Por, pas verifikimit të fakteve nga hibrid.info, është vërtetuar se fotografia paraqet momentet e vizitës së Çitakut në komunën e Prizrenit, në vitin 2013, gjatë kohës kur ajo kryente funksionin e ministres së Integrimeve Evropiane, meqë rast ajo ishte takuar edhe me përfaqësues të Kishës Ortodokse në Prizren.
Llogaria në fjalë po ashtu numëron 7 mijë ndjekës (këtu).
Vegëza e imazhit të publikuar nga llogaria “Fleta Press” në Facebook:
Pas hulumtimit me anë të makinave të kërkimit, hibrid.info e ka gjetur se imazhi në fjalë është marrë nga komunikata e publikuara në ueb-faqen e Ministrisë së Integrimeve Evropiane, për vizitën e ish-drejtueses së këtij dikasteri Vlora Çitaku në komunën e Prizrenit (shih këtu).
Në komunikatën e lëshuar më 22 janar të vitit 2013, bëhet e ditur se qëllimi i vizitës ishte për ta dënuar dëmtimin e varrezave ortodokse në Prizren, ku ajo ishte takuar edhe me përfaqësuesit e Kishës Ortodokse në këtë komunë.
Po ashtu për të vërtetuar se vizita e ministres Çitaku në vitin 2013, nuk lidhet me vendimin e Gjykatës Kushtetuese mbi pronat e Manastirit të Deçanit, hibrid.info ka gjetur se ky institucion vendimin në lidhje me këtë çështje e kishte marrë dhe e kishte publikuar në maj të vitit 2016 (shih këtu).
Analiza:
Pretendimi se imazhi, i cili shfaq nënkryetaren e PDK-së, Vlora Çitaku, pranë një objekti fetar ortodoks, paraqet momente të vizitës së saj në Manastirin e Deçanit, nuk është i vërtetë.
Hibrid.info ka gjetur se imazhi i publikuar tregon për vizitën e Çitakut në komunën e Prizrenit, në vitin 2013, gjatë kohës sa ajo ishte ministre e Integrimeve Evropiane, ku kishte vizituar edhe Kishën Ortodokse në këtë komunë.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.