Portali “newsonline48h.com” ka publikuar një artikull me titull “LDK – Kerkon voten e qytetareve ne jemi zgjedhja me e mir per ju jo Albini?”.
Pas analizës së kontrollit të fakteve të kryer nga hibrid.info, del që ky artikull përmban titull të rremë, i cili nuk përputhet me përmbajtjen. Gjithashtu, lajmi është i vjetër i publikuar më 26 dhjetor 2020.
Në artikullin autentik të datës 22 dhjetor 2020 shkruan se kryesia e LDK-së, përmes një njoftimi, kanë shprehur bindjen se është zgjedhja më e mirë dhe se do të dalin dal fitues në zgjedhjet e radhës. Pra, asnjëherë nuk është përmendur se është zgjedhje më e mirë se sa Albin Kurti, ashtu siç pretendohet në titullin e artikullit të publikuar në “newsonline48h.com”.
Teksti i artikullit të publikuar në “newsonline48h.com”:
LDK – Kerkon voten e qytetareve ne jemi zgjedhja me e mir per ju jo Albini?
LDK konsideron se është partia më e mirë për të udhëhequr me qeverinë e re të Republikës.
Në një njoftim për media, partia e Isa Mustafës ka bërë të ditur për takimin e sotëm të kryesisë së ngushtë.
“Sot, është mbajtur mbledhja e Kryesisë së LDK-së, ku është diskutuar për zhvillimet politike në vend.
Po ashtu janë diskutuar kriteret dhe lista zgjedhore me kandidatët për deputetë. Lidhja Demokratike e Kosovës është e bindur se është zgjedhja më e mirë dhe këto zgjedhje do të dal fituese”, thuhet në njoftimin e tyre.
Vegëza e artikullit të publikuar në “newsonline48h.com”:
https://newsonline48h.com/tuv/news/1547?fbclid=IwAR1f4XkgJOY2z_lkjEtKwOMbjaf6Hkqw-4AdIMPDy8c2CQm_9goXiblXnjs
Më poshtë mund të gjeni vegzën e artikullit autentik të publikuar në kohë reale nga indeksonline.net.
https://indeksonline.net/ldk-i-drejtohet-qytetareve-jemi-zgjidhja-me-e-mire1/
Analiza:
“Newsonline48h.com” ka përdorur një lajm të vjetër të cilin e ka publikuar duke pretenduar ta paraqes si aktual, dhe duke i vënë titull të sajuar. Ky shkrim është publikuar edhe në faqen “Gazeta Aktive” në Facebook, e cila numëron afër 90 mijë pëlqime. Pas verifikimit nga hibrid.info, rezulton se ky artikull mund të kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
