Shkroi: Fatbardh Dema
Në mediat sociale si “Telegram”, “TikTok” e “X” janë duke qarkulluar imazhe që paraqesin profilet zyrtare në X të kryeministrit në detyrë, Albin Kurtit dhe presidentes Vjosa Osmani.
Në këto imazhe pretendohet se llogaritë zyrtare të dy krerëve të shtetit të Kosovës, për vendndodhje e kanë Serbinë.
Të gjitha këto postime në mediat sociale janë publikuar nga llogari e kanale me përmbajtje në gjuhën serbe, por edhe angleze.
Dy kanale në Telegram në gjuhën serbe “КОРИДОР” (KORIDOR) dhe “БУНКЕР” (BUNKER), kanë publikuar imazhin që shfaq profilin e Kurtit në X, ku pretendohet se llogaria e tij ka vendndodhjen në Serbi. (shih fotografinë më poshtë)
E njëjta përmbajtje është gjetur e publikuar në gjuhën serbe në TikTok nga llogaria “kristi47905”, si dhe në X nga llogaritë me emër “BraticVlad3613”, “PrijateljNaroda” e “vesnaveizovic”.
Çka nuk shkon me këtë përmbajtje?
Hibrid.info ka kontrolluar në profilin zyrtar të Kurtit në X, në seksionin “About this account” (Rreth kësaj llogarie), e që rezultatet shfaqin se kryeministri në detyrë nuk e ka fare të cekur vendndodhjen e llogarisë aty. (shih këtu)
Po ashtu, në përmbajtjen e publikuar nga llogaritë e lartcekura vërehen ndërhyrje digjitale. Distanca midis ikonave dhe tekstit nuk është e barabartë me standardin e platformës. (shih fotografinë më poshtë)
–
Po ashtu, hibrid.info ka gjetur edhe përmbajtje tjera të publikuara nga llogari e kanale në gjuhën serbe e angleze të cilat pretendojnë se edhe në llogarinë zyrtare të Presidentes Vjosa Osmani në X, vendndodhja i figuron në Serbi.
Përmbajtjet me këtë pretendim janë gjetur të publikuara në X nga profilet, si “GlobalDiss”, “BraticVlad3613” e “ZekyPriest3”.
Hibrid.info ka kontrolluar në llogarinë e Osmanit në platformën X, në seksionin “About this account”, ku është vërtetuar se vendndodhja nuk i figuron fare. (shih këtu)
Pretendimet se llogaritë zyrtare të Albin Kurtit dhe Vjosa Osmanit në X figurojnë me vendndodhje “Serbia”, nuk qëndrojnë. Imazhet që po qarkullojnë në Telegram, TikTok dhe X nga llogari në gjuhën serbe dyshohet të jenë të manipuluara.
Pas verifikimit në profilet zyrtare të të dy krerëve të shtetit, tregohet qartë se në seksionin “About this account” nuk shfaqet fare vendndodhja.
Hibrid.info gjeti mospërputhje vizuale në imazhet e publikuara, si distancat e çrregullta mes ikonave dhe tekstit që tregojnë se ato nuk janë “screenshot-e” autentike nga platforma X, por pamje të manipuluara.
Këto përmbajtje të publikuara në gjuhën serbe, duket se janë pjesë e një fushate nga disa llogari e kanale të dyshimta, të cilat kanë publikuar përmbajtje të montuara me pretendimin t’i paraqesin si reale.