Shkroi: Etrit Rexhepi
Publikohet një video-material me mbishkrimin që pretendon se Elon Musk, drejtues i Departamentit të Efiçiencës së Qeverisë në Shtetet e Bashkuara të Amerikës, pritet të dalë në mbështetje të Bedri Hamzës, kandidatit për kryeministër nga radhët e Partisë Demokratike të Kosovës (PDK), në zgjedhjet parlamentare të 9 shkurtit.
Videoja që shfaq pamje të një moderatoreje në një studio të lajmeve duke e komunikuar një lajm, është publikuar në TikTok (4 shkurt) nga një llogari me emrin “atdheu14”.
Çka nuk shkon me përmbajtjen?
Hibrid.info ka gjetur se pretendimi është i rremë dhe se videoja ka përmbajtje të gjeneruar nga Inteligjenca Artificiale (IA).
Duke e vëzhguar videon, është vërejtur se lëvizja e buzëve të moderatores nuk është në sinkron me audion.
Andaj, hibrid.info ka kontrolluar përmes “HiveModeration.com”, platformë për detektimin e përmbajtjeve të gjeneruara nga IA, në bazë të vlerësimit të së cilës mund të konstatohet se pamja e trajtuar, në përgjithësi, ka mundësi të ketë përmbajtje të krijuara nga inteligjenca artificiale.
Rezultatet e këtij kontrolli tregojnë se audioja në këtë video mund të jetë e gjeneruar nga IA.
Hibrid.info po ashtu ka hulumtuar përmes makinës së kërkimit, “Google”, për të gjetur ndonjë artikull që jep informacionin e pretenduar se, Musk do ta përkrahë Hamzën. Por, një artikull i tillë nuk është shfaqur (shih këtu).
Analiza:
Pretendimi se Elon Musk pritet ta përkrahë Hamzën si kandidat për kryeministër në zgjedhjet parlamentare të 9 shkurtit, është i pasaktë.
Hibrid.info ka gjetur se kjo video ka të ngjarë të ketë përmbajtje të krijuar nga Inteligjenca Artificiale (IA).
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.