Disa media në gjuhën serbe kanë publikuar artikuj me deklaratën e kryeredaktorit të portalit informativ “telegrafi.com”, Muhamet Hajrullahu (këtu), rreth protestave opozitare në Beograd.
Këto media kanë pretenduar se Hajrullahu i është gëzuar protestave të opozitës në Beograd duke pretenduar të ketë thënë: “E dridhëm Vuçiqin, i erdhi fundi”.
Pas verifikimit të fakteve është gjetur se cicërima në Twitter e Hajrullahut është shtrembëruar nga mediat në gjuhën serbe.
Vegëzat e artikujve të publikuar në disa media në gjuhën serbe:
https://www.b92.net/info/vesti/index.php?yyyy=2023&mm=05&dd=28&nav_category=11&nav_id=2340767
https://informer.rs/vesti/politika/797797/albanski-portal-aleksandar-vucic-protest-opozicije
Pjesë të artikullit të publikuar në disa media në gjuhën serbe:
Muhamet Hajrulahu, redaktor i portalit Telegrafi nga Prishtina, ka mbështetur protestat politike të opozitës dhe ka publikuar në Twitter një fotografi nga protesta.
“E dridhëm Vuçiqin, i erdhi fundi”, ka shkruar ai.
Mediat në gjuhën serbe, duke iu referuar një cicërime të Hajrullahut, kanë ngritur pretendimin se ky i fundit i është gëzuar protestat opozitare në Beograd, duke e shtrembëruar deklaratën e tij në këtë cicërim, ku interpretohet të ketë thënë: “E dridhëm Vuçiqin, i erdhi fundi”. Pra, duke e paraqitur postin e Hajrullahut si në vetën e parë.
Në fakt, Hajrullahu në profilin e tij në Twitter, duke publikuar një foto nga protesta kundër Vuçiqit në Beograd, ka shkruar se “ja paskan dridh themelin Vuçiqit në Beograd sot, po get i ka ardhur fundi”. (këtu)
Lidhur me këtë shtrembërim ka reaguar edhe vet Hajrullahu nëpërmjet një cicërime në Twitter duke kërkuar nga mediat në gjuhën serbe që të mos i shtrembërohen deklaratat e tij. (këtu)
Analiza:
Faktet tregojnë se kryeredaktori i portalit informativ “telegrafi.com” nuk ka deklaruar se e “dridhëm Vuçiqin, i erdhi fundi” dhe se mezi i ka prit protestat opozitare në Beograd, por “ja paskan dridh themelin Vuçiqit në Beograd sot, po get i ka ardhur fundi”.
Mediat në gjuhën serbe kanë shtrembëruar deklaratën e Hajrullahut.
Bazuar në metodologjinë e punës hibrid.info këtë pretendim e vlerëson si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
