Disa portale informative në Kosovë duket se kanë rënë pre e një lajmi të pakonfirmuar, lidhur me shpërthimin e një veture mbrëmë në qytetin e Stambollit, duke e cilësuar atë si sulm të ri terrorist pas atij që ndodhi ditë më parë në sheshin Taksim të këtij qyteti.
Portalet si “Insajderi.org”, “GazetaBlic.com”, “Demokracia.com” dhe “Drenicasot.info”, e kanë publikuar këtë artikull duke i vënë titullin “Sulmi i ri në Stamboll, shpërthen vetura-bombë”.
Këto portale të lartcekura, këtë lajm e kanë bazuar në një llogari të pa verifikuar në “Twitter” që mban emrin “LWNChannel”, e cila videos me veturën e djegur i ka bashkangjitur përshkrimin “Një tjetër sulm terrorist raportohet në Turqi, një makinë bombë…”.
Vegëzat e artikullit të publikuar në portalet informative në Kosovë:
Postimin e kësaj video me informacion të pakonfirmuar të publikuar në Twitter nga llogaria “LWNChannel” mund ta gjeni këtu.
Lidhur me këtë artikull që u shpërnda në mediat online në Kosovë, ka reaguar edhe gazetari dhe redaktori shqiptar në Radio Televizionin turk ndërkombëtar “TRT World”, Abdylvehab Ejupi, i cili përmes llogarisë së tij në Facebook ka konfirmuar se lajmet për sulm terrorist në Fatih/Stamboll nuk janë të vërteta. (shih këtu)
Postimi i plotë i Ejupit në Facebook:
Lajmet për sulm terrorist në Fatih /Stamboll nuk janë të vërteta.
Pamjet e zjarrit në Fatih të Stambollit po përhapen me shpejtësi, veçanërisht në rrjetet sociale. Dhe të gjithë, njëzëri, e pasqyrojnë ngjarjen me perceptimin e një “sulmi terrorist” dhe shumë prej tyre përdorin termin “automjet me bombë”.
Gjitha këto llogari, pa asnjë konfirmim,
dhe njëzëri e portretizojnë incidentin sulm të ri terrorist në Stamboll dhe e kthejnë atë në një operacion perceptimi kundër Turqisë. Kujdes mos kontribuoni.
Ajo që ndodhi është një incident, që çdo kund (mund) ndodhë:
Drejtuesi i makinës me targë 34 GS 6448 në rrugën Kocamustafapaşa, Fatih ka vërejtur se nga automjeti i tij, qe ka qen me gaz (LPG), dilte tym, është ndalur buzë rrugës dhe ka kërkuar ndihmë nga njerëzit përreth. Pas pak automjetit i vihet flaka si pasojë e rrjedhës së gazit dhe zjarri përhapet edhe tek 4 automjetet që kanë qenë përreth. Zjarri shpejt shuhet nga ekipet e zjarrfikësve. Nuk raportohet për viktima e as të lënduar.
Edhe portali i Radio Televizionit turk për Ballkanin “TRT Ballkan” ka reaguar lidhur me këtë lajm të publikuar nga llogaria “LWNChannel”. Ky portal sqaroi se djegien e disa veturave në Stamboll, mediat e rajonit e kanë paraqitur si sulm të ri terrorist, duke u thirrur në një profil të pakonfirmuar në Twitter. (shih këtu)
Se kjo llogari në Twitter nuk është kredibile, e tregon fakti se ajo është hapur në muajin nëntor të këtij viti dhe aktualisht numëron vetëm 75 ndjekës. (shih këtu)
Analiza:
Disa portale në Kosovë kanë rënë pre e një llogarie të pakonfirmuar në Twitter, e cila kishte raportuar se mbrëmë (15 nëntor) në Stamboll kishte ndodhur një sulm terrorist me anë të një veture-bombë.
Këtë postim të kësaj llogarie, e kanë postuar si të mirëqenë disa nga portalet në Kosovë, pa e verifikuar atë.
Bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
