Medium në gjuhën serbe nga Serbia “vesti-online.com”, ka publikuar një artikull duke pretenduar se deputeti i Kuvendit, nga radhët Partisë Demokratike të Kosovës (PDK), Xhavit Haliti, ka shprehur dëshirën për ndryshim kufijsh në Ballkan.
Në titullin e këtij artikulli, të publikuar sot (20 maj), shkruan – “Haliti: Do të ishte mirë që Kosova të bashkohet me Shqipërinë, ndërsa Serbia të merr RS-në”.
Ky titull lë të kuptohet se kjo është një dëshirë e deputetit Haliti. Mirëpo, në fakt, Haliti gjatë një interviste për televizionin kosovar KTV (19 maj), të cilit i referohen edhe mediumi serb, ka thënë se ka dëgjuar dëshira për ndryshime të kufijve në Ballkan me vija etnike, dhe jo siç pretendohet në titullin e artikullit të “vesti-online.com”.
Vegëza e artikullit të “vesti-online.com”:
Haliti, gjatë një interviste të dhënë për emisionin “Desku” në KTV, kishte thënë se ka dëgjuar nga qarqe të ndryshme për idenë e ndryshimeve të kufijve në rajonin e Ballkanit Perëndimor (shih këtu). Sipas tij, në konferenca të ndryshime ndërkombëtare janë shpalosur këto ide nga ndërkombëtarët por edhe nga zyrtarët serbë dhe ata shqiptarë, por pa dhënë detaje më të hollësishme.
Deklarata e Xhavit Halitit e dhënë gjatë emisionit:
Është një mendim që do të ishte mirë që Kosova e Shqipëria të ishin të bashkuara, Serbia t’i marrë territoret e Republikës Sërpska e të bëhen dy popujt më të mëdhenj. I kam dëgjuar këto biseda, në qarqe shumë të larta politike, edhe ndërkombëtare, i kam dëgjuar edhe serbët, edhe shqiptarët. Në konferenca ndërkombëtare njerëzit janë të lirë të flasin. Është biseduar, njerëzit kanë të drejtë të bisedojnë. Është diçka që s’pranohet sepse ndryshon gjithçka. Mirëpo pas kësaj në Ukrainë, nëse bashkësia ndërkombëtare lejon diçka të tillë që ato rregullat e vendosura me kohë për funksionimin dhe bashkëfunksionimin e shteteve dhe mosndryshimin e kufijve, nëse rregulli i tillë është i vlefshëm për dikë është edhe për dikë tjetër”.
Analiza:
Pretendimi i bërë përmes titullit të artikullit të “vesti-online.com”, rezulton të jetë një interpretim i shtrembëruar i deklaratës.
Pra Haliti nuk ka thënë se ndryshimi i kufijve është dëshirë e tij, siç pretendohet në titullin e mediumit serb.
Në bazë të kontrollit të fakteve, ky artikull merr vlerësimin si “Manipulim i Fakteve”.
Arsyetimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
