Pretendimi se kancelarja e Gjermanisë, Angela Merkel, është vajza e diktatorit gjerman, Adolf Hitlerit, qarkullon qe një kohë të gjatë në shumë grupe në rrjete sociale dhe ueb faqe që shpërndajnë teori konspirative.
Një pretendim i tillë është vërtetuar që është i pa vërtetë, duke i marr për bazë disa fakte.
Ky pretendim bazohet në një fotografi ku shihet ish kancelari i Gjermanisë Naziste, Adolf Hitler, me një vajzë, të cilën, konspiracionistët mundohet ta argumentojnë se është Angela Merkel në moshën fëmijërore.
Kjo fotografi qarkullon tash e disa vite në rrjetet sociale dhe është shpërndarë në masë të madhe.
Këto pretendime të pavërteta janë publikuar edhe nga disa portale të dyshimta në gjuhën shqipe, dhe janë shpërndarë në faqe në rrjetet sociale me numër të madh të përcjellësve.
Artikulli publikuar sot (11 qershor) nga portali i dyshimtë “klikoshqip.com”, që titullohet “Shokuese: Angela Merkel është vërtetë vajza e Hitlerit” është paraqitur fotografia e Hitlerit me vajzën e vogël, që synohet nga ky portal të paraqitet si argument për pretendimin e bërë.
Përmbajtja e artikullit të publikuar nga “klikoshqip.com”:
Gjykuar sipas dokumenteve të shërbimit kryesor të zbulimit të Republikës Demokratike Gjermane të njohur si Stas, Angela Merkel është trashëgimtare e Adolf Hitlerit.
Në vitin 1954, lindi një fëmijë, një vajzë e vogël, të cilën Stasi e identifikon si Angela Merkel, kancelarja e sotme e Gjermanisë.
Data e lindjes zyrtare e saj është 17 korrik 1954, megjithatë, sipas dokumenteve të kësaj policie sekrete aktualisht në arkivat sovjetike të KGB-së, ditëlindja e saj e vërtetë është 20 prill 1954.
Vegëza e artikullit të publikuar nga “klikoshqip.com”:
Ndonëse në këtë artikull shihet se përmbajtja është e pjesshme, përmes një hulumtimi në makinat e kërkimit, hibrid.info ka gjetur se ky artikull është publikuar më parë nga disa media tjera të dyshimta. Në mesin portaleve që e kanë publikuar këtë artikull është edhe “gazetanewborn.co”, i cili gjendet në version më të plotë se në “klikoshqip.com”.
Vegëza e artikullit të publikuar nga “gazetanewborn.co”:
http://www.gazetanewborn.co/bota-eshte-ne-doren-e-saj-sherbimi-sekret-gjerman-merkel-eshte-vajza-e-hitlerit-video/
Të tilla pretendime janë bërë edhe nga konspiracionisti shqiptar, Alfred Cako, i cili pa ndonjë argument e pohon këtë nëpër emisione në gjuhën shqipe.
Pretendimi i Alfred Cakos në emisionin “Kojshia Show”, në minutën 56:
Mirëpo këto pretendime bien poshtë nga një argument i vetëm edhe kryesor, që është data e vdekjes së diktatorit Adolf Hitlerit dhe ajo e lindjes së Angela Merkelit. Pra Hitleri kishte vdekur në përfundim të Luftës së Dytë Botërore, në kapitullimin e Gjermanisë Naziste, 30 prill, 1945 (këtu), ndërsa kancelarja aktuale e Gjermanisë – Merkel, kishte lindur më 17 korrik të vitit 1954 (këtu), pra rreth 9 vjet më pas, dhe është e bija e Horst Kasner, një pastor në Kishën Protestante (këtu).
Gjithashtu edhe në fotografinë e cila përdoret si aludim për ta argumentuar këtë pretendim, e ka bërë fotografi personal i Hitlerit, Heinrich Hoffmann, i cili ishte arrestuar pas përfundimit të luftës dhe ishte mbajtur i nën vëzhgim të organeve gjermane, deri në vdekjen e tij, në vitin 1957.
https://archive.org/details/HoffmannHeinrcih-HitlerAbseitsVomAlltag/page/n25/mode/2up
Vitet si fotograf aktiv i ka pasur nga 1903 deri më 1945. Pra Hoffmann, nga përfundimi i luftës, nuk është lejuar më të merret me profesionin e fotografit, pasi që ka qenë i arrestuar. Ky shërben edhe si një argument shtesë që mohon se fotografia është bërë në vitin 1954 (këtu).
Analiza:
Pretendimet se vajza në fotografi me diktatorin nazist, Adolf Hitler, është kancelarja gjermane, Angela Merkel, nuk ka asnjë argument të qëndrueshëm. Nga kontrolli i fakteve nga hibrid.info, mund të shihet se çdo argument i gjetur, bie ndeshë me këtë pretendim, duke nisur nga periudha kur jetoi Hitleri dhe data e lindjes së Merkelit, ashtu edhe koha kur ka mundur të jetë shkrepur kjo fotografi nga fotografi personal i Hitlerit, Heinrich Hoffmann, që ndërlidhet me kohën kur ai ushtroi këtë veprimtarin si dhe proceset gjyqësore që kishin filluar ndaj tij, deri në ditën kur vdiq.
Për këtë arsye, hibrid.info i vlerëson këto pretendime të publikuara edhe në disa ueb faqe me përmbajtje në gjuhën shqipe si “Teori Konspirative”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
