Ministri i brendshëm i Kosovës, Xhelal Sveçla ka thënë se asnjë shtetas kosovar nuk është duke luftuar në Ukrainë.
Këtë deklaratë Sveçla e bëri duke iu referuar një liste të publikuar në Twitter nga Milan Knezeviq, president i Partisë Popullore Demokratike të krahut të djathtë në Mal të Zi. Në këtë listë pretendohet se në Ukrainë marrin pjesë afër 7 mijë mercenarë të cilët luftojnë në anën e ukrainasve përballë agresionit rus.
Në mesin e këtyre 7 mijë mercenarëve, në këtë listë thuhet se nga Kosova janë angazhuar 156 ushtarë, por që deri më tani janë vrarë 60 prej tyre.
Postimi në Twitter i Knezeviqit, i përkthyer në gjuhën shqipe:
Në mesin e 6956 mercenarëve nga e gjithë bota që bënin luftë kundër rusëve në Ukrainë ishin edhe dy malazezë. Unë them “ishte” sepse një për fat të keq vdiq.
Dhe çfarë të bëjmë tani? A duhet të dërgojmë 20 ushtarë në Letoni, apo Ranko Krivokapić do ta dërgojë Lavrovin në tren?
Shën Pjetri na njihte më së miri.
Vegëza e postimit të Knezeviqit në Twitter:
Pasi qasja në mediat ruse për kosovarët është e ndaluar, hibrid.info përmes hulumtimit të kryer ka arritur të gjejë se kjo listë me mercenarë që marrin pjesë në krah të Ukrainës kundër agresionit rus, është dalë nga Ministria e Mbrojtjes në Rusi.
Kjo u bë e qartë nga Agjencia turke e lajmeve “Anadolu Agency”:
Ministria ruse e Mbrojtjes publikoi të premten të dhënat për mercenarët e huaj që luftojnë në anën e Ukrainës.
Sipas ministrisë, 6,956 njerëz kanë mbërritur në Ukrainë që nga 24 shkurti, kur filloi lufta, 1,956 vdiqën në beteja, ndërsa 1,779 u larguan nga vendi.
Që nga e premtja, të paktën 3,221 të huaj po luftojnë në anën ukrainase, tha zëdhënësi i Ministrisë së Mbrojtjes Igor Konashenkov në një konferencë shtypi në Moskë. (shih këtu)
Se ky pretendim rus për pjesëmarrjen e afër 7 mijë mercenarëve në favor të Ukrainës nuk është i besueshëm, e bënë të qartë fakti se në të shfaqen vetëm shifra, të cilat nuk argumentojnë apo vërtetojnë pretendimin e bërë.
Pra, në këtë listë nuk ka emra apo të dhëna tjera lidhur me identitetin e këtyre personave.
Lidhur me pretendimin rus se 156 kosovarë janë angazhuar në Ukrainë, ka folur edhe ministri i Brendshëm në Kosovë, Xhelal Sveçla, i cili ka bërë të ditur se asnjë kosovar nuk është duke marrë pjesë në këtë luftë.
“Nuk ka asnjë shtetas të Kosovës që janë duke luftuar në Ukrainë, këto janë në kuadër të propagandës ruse e cila në vazhdimësi mundohet që të sulmojë jo vetëm Kosovën por të gjithë vendet e perëndimit me qëllim që të arsyetojë luftën e saj të padrejtë në Ukrainë”, tha Sveçla për KosovaPress. (shih këtu dhe këtu)
Pretendime për pjesëmarrje të kosovarëve në luftën e Ukrainës, krah këtyre të fundit, kanë bërë edhe zyrtarë tjerë të lartë rusë. Është ministri i Jashtëm i Rusisë, Sergey Lavrov, që ka thënë se “mercenar nga Kosova janë vendosur Donbas”, pretendim ky i trajtuar më 18 shkurt nga hibrid.info dhe i vlerësuar si dezinformatë (këtu).
Analiza:
Ministria ruse e Mbrojtjes ka publikuar një listë me pretendimin se në luftën në Ukrainë po marrin pjesë afër 7 mijë mercenarë të cilët janë në krah të ukrainasve. Në këtë listë pretendohet se 156 pjesëmarrës janë nga Kosova, e që 60 prej tyre tashmë janë vrarë.
Këtë listë e ka postuar në llogarinë e tij në Twitter edhe presidenti i Partisë Popullore Demokratike të krahut të djathtë në Mal të Zi, Milan Knezeviq.
Lidhur me pjesëmarrjen e kosovarëve në luftën që po zhvillohet në Ukrainë, ka folur ministri i Mbrojtjes në Kosovë, Xhelal Sveçla, i cili ka thënë që nuk ka asnjë kosovar në këtë luftë dhe se këto janë propaganda nga Rusia, e cila në vazhdimësi mundohet që të sulmojë jo vetëm Kosovën por të gjithë vendet e perëndimit për të arsyetuar luftën e saj të padrejtë në Ukrainë.
Pas analizës së kontrollit të fakteve bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
