Portali i dyshimtë me përmbajtje në gjuhën shqipe “albasky.com” ka publikuar një artikull me titull “Mustafa: Ose të themelohet Asociacioni, ose vendi të shkojë në zgjedhje”.
Hibrid.info ka verifikuar faktet në këtë artikull dhe ka vërtetuar se titulli nuk i përgjigjet përmbajtjes. Edhe lajmi i paraqitur në përmbajtje rezulton të jetë i vjetër, i publikuar fillimisht më 2 dhjetor të vitit 2021.
Në përmbajtje gjendet një intervistë e ish-kryeministrit Isa Mustafa, i cili kishte thënë se “formimi i Asociacionit të komunave me shumicë serbe është obligim i Kosovës, të cilit nuk mund t’i shmanget”.
Por, Mustafa në asnjë rast nuk ka thënë atë që pretendohet se mos themelimi Asociacioni, e dërgon vendin në zgjedhje.
Vegëza e artikullit të publikuar në portalin e dyshimtë “albasky.com”:
Ky artikull me titull të rremë është shpërndarë edhe në Facebook nga faqja “Gazeta Aktive”, në postimin e së cilës janë grumbulluar numër i madh komentesh e reagimesh. (shih këtu)
Pas hulumtimit të kryer përmes makinave online të kërkimit, hibrid.info ka arritur të gjejë intervistën e Mustafës dhënë për emisionin Desku në “KTV”, vegëzën e të cilit mund ta gjeni këtu.
Analiza:
Portali i dyshimtë “albasky.com” ka publikuar një intervistë të vjetër të ish-kryeministrit të Kosovës, Isa Mustafa, të cilin është munduar ta paraqesë si aktual duke i vënë titull të sajuar.
Pas analizës së kontrollit të fakteve, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.