Një llogari në Tiktok që mban emrin “Jongross” ka publikuar një video-material, në të cilin shfaqet imazhi i Naim Murselit, të arrestuarit të dyshuar për planifikimin e marrjes së jetës së Liridona Ademaj Murselit.
Në video-material pretendohet se Murseli i ka dhënë fund jetës së tij dje gjatë ditës (11 dhjetor).
Por pas hulumtimit dhe verifikimit të bërë nga hibrid.info, nuk janë gjetur burime konkrete që vërtetojnë pretendimin.
Vegëza e video-materialit të publikuar nga “Jongross”:
https://www.tiktok.com/@jongross/video/7311335978793323809
Hibrid.info ka kërkuar në faqet zyrtare të Policisë së Kosovës dhe Shërbimit Korrektues të Kosovës për ndonjë njoftim lidhur me këtë pretendim, por nuk ka gjetur asgjë. (shiko këtu dhe këtu)
Me anë të makinës së kërkimit, “Google”, hibrid.info ka hulumtuar mbi pretendimin e publikuar nga llogaria në fjalë, por nuk ka gjetur burime që e mbështesin atë. (shih këtu)
Analiza:
Një llogari në TikTok ka publikuar video-material që pretendon se Naim Murseli, i dyshuar për planifikimin e marrjes së jetës së Liridona Murselit, ka bërë vetëvrasje.
Por pas verifikimit nga hibrid.info, deklarata e pretenduar nuk është provuar.
Andaj bazuar edhe në metodologjinë e punës, hibrid.info e vlerëson këtë artikull si, “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.