Portali informativ “Kosova-sot.info” sot (26 gusht) ka publikuar një artikull me titull “Si do t’i marrin paratë e bonusit qytetarët?”.
Pas verifikimit të fakteve nga hibrid.info, është vërtetuar se titulli është përgjithësues, duke mos e bërë të qartë se autoritetet e cilit vend kanë marrë një vendim të tillë.
Detajet e lajmit qartësohen vetëm në përmbajtje, ku bëhet e ditur se qytetarët mbi 18 vjeç që jetojnë prej së paku 183 ditë (6 muaj) në Austri, nga muaji shtator do të marrin bonus prej 500 eurosh nga shteti.
Duke ditur se ky portal është i regjistruar në Kosovë (shih këtu) dhe shumicën e lexuesve i ka shqipfolës (shih këtu), kjo mund t’i dezinformojë lexuesit se ky lajm ka të bëjë me vendin tonë.
Pjesë nga artikulli i publikuar në portalin “Kosova-sot.info”:
Si do t’i marrin paratë e bonusit qytetarët?
Cilët persona do të përfitojnë nga 500 euro? Sa para do të marrin fëmijët? Si duhet aplikuar për të marr bonusin?
Bonusi prej 500 eurosh për secilin banor mbi 18 vjeç që jeton në Austri, ishte paralajmëruar për t’u shpërndarë nga muaji tetor, por qeveria austriake vendosi që këtë bonus ta shpërndajë nga muaji shtator.
Vegëza e artikullit të publikuar në portalin “Kosova-sot.info”:
Në përmbajtje të këtij artikulli të publikuar nga portali i lartcekur, është cituar portali informativ në gjuhën shqipe që operon në Zvicër “albinfo.ch”.
Mirëpo, pas hulumtimit të kryer nga hibrid.info, është vërtetuar se portali “Albinfo.ch” ka raportuar saktë në titull se ngjarja ka të bëjë me shtetin austriak. (shih këtu)
Analiza:
Portali “Kosova-sot.info” ka publikuar një artikull që ka të bëjë me shtetin e Austrisë, i cili ka vendosur që qytetarëve të moshës mbi 18 vjeç t’u jap bonus prej 500 eurosh, ndërsa në titull nuk sqarohet se për cilin shtet bëhet fjalë.
Kjo lë të kuptohet se lajmi ka të bëjë me Kosovën, duke e ditur se ky medium është i regjistruar në vendin tonë dhe shumica e audiencës janë shqipfolës nga Kosova.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
