Disa portale informative në gjuhën shqipe sot (20 shtator) kanë publikuar një artikull me titull “Në Obiliq, vajza ther me thikë nënën e saj”.
Pas verifikimit të fakteve të kryer nga hibrid.info, është vërtetuar se titulli dhe një pjesë e përmbajtjes së artikullit është e pasaktë, pasi që në njoftimin e Policisë së Kosovës bëhet e ditur se ngjarja ka ndodhur në Fushë Kosovë, e jo në Obiliq, siç pretendohet.
Vegëza e artikullit të publikuar në portalet “EkonomiaOnline.net”, “dtvmedia.net” dhe “Paparaci.com”:
Pjesë nga artikulli i publikuar në portalet e lartcekura:
Një ngjarje e rëndë ka ndodhur në Obiliq.
Atje është arrestuar një e dyshuar femër pasi dyshohet se ka sulmuar nënën e saj me thikë.
Viktima ka pranuar tretman dhe e dyshuara është dërguar në mbajtje.
Në njoftimin e bërë nga Policia e Kosovës, i cili gjendet edhe në përmbajtje të artikullit të publikuar nga portalet e lartcekura, bëhet e qartë se ngjarja ka ndodhur në Fushë Kosovë.
Njoftimi i Policisë së Kosovës:
Fushë Kosovë. 19.09.2023 – 01:45. Është arrestuar e dyshuara femër kosovare, pasi që pas një mosmarrëveshje ka sulmuar me një mjetë të mprehtë (thikë) nënën e saj viktimën femër kosovare. Viktima ka pranuar tretman mjekësor. Me vendim të prokurorit e dyshuara është dërguar në mbajtje.
Analiza:
Disa portale informative kanë raportuar gabimisht në lidhje me një ngjarje të ndodhur në Fushë Kosovë, duke pretenduar se e njëjta ka ndodhur në Obiliq.
Bazuar në metodologjinë e punës, hibrid.info e vlerëson këtë artikull si “Gabim”.
Arsyetimi:
Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.