Shkroi: Etrit Rexhepi
Llogaria në Facebook me emrin “Fleta Press” ka publikuar një imazh me datë 7 prill ku paraqitet një artikull nga portali informativ “telegrafi.com”.
Pas verifikimit nga hibrid.info është vërtetuar se artikulli i shfaqur në fotografi, i titulluar “Radoiçiq kërcënon Kurtin: Koha do të tregojë se kush do të pësojë dhe do të paguajë në fund” është i publikuar në shtatorin e vitit të kaluar (2023), informacion i cili, nuk bëhet i qartë në imazhin në fjalë.
Publikimi i një lajmi të vjetër pa dhënë asnjë sqarim mbi arsyet e postimit, duke u bazuar edhe nga numri i ndjekësve (7 mijë) të kësaj llogarie, mund të lexohet nga audienca si ngjarje aktuale.
Vegëza e imazhit të publikuar nga llogaria “Fleta Press” në Facebook:
Pas hulumtimit me anë të makinave të kërkimit, hibrid.info ka gjetur të artikullin e shfaqur në këtë imazh, të publikuar nga portali informativ “telegrafi.com”, në shtator të vitit të kaluar (shih këtu).
Artikulli bën fjalë për një reagim të ish-nënkryetarit të Listës serbe, Milan Radoiçiq, të publikuar në faqen e këtij subjekti politik në Facebook (shih këtu).
Për të vërtetuar se ngjarja nuk është aktuale, hibrid.info ka kontrolluar dhe ka gjetur edhe artikuj nga mediat tjera, të cilat kanë raportuar mbi reagimin e Radoiçiq në shtatorin e vitit 2023 (shih këtu dhe këtu).
Hibrid.info edhe më herët ka trajtuar publikime të ngjashme nga llogaria në fjalë me tendencë për të paraqitur lajmet e vjetra si aktuale (këtu dhe këtu).
Analiza:
Artikulli i vitit të kaluar mbi një reagim të ish-nënkryetarit të Listës serbe, ripublikohet nga një llogari në Facebook.
Mos saktësimi i arsyeve dhe datës së publikimit të lajmit, mund ta paraqesë at si aktual për audiencën.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.