Portale të dyshimta kanë publikuar një artikull me titull “Albin Kurti e përzë nga zyra Goran Rakiqin dhe ia mbyll derën para hundës arsyeja e pazakontë”.
Pas verifikimit të fakteve të kryer nga hibrid.info, është vërtetuar se si titulli i këtij artikulli, ashtu edhe pjesë të përmbajtjes, janë të rreme.
Gjatë hulumtimit përmes makinave online të kërkimit, hibrid.info ka arritur të gjejë artikullin autentik të publikuar në portalin “buletiniekonomik.com”, i cili është publikuar më 2 shkurt 2022.
Në përmbajtje gjendet deklarata e zëvendësministrit të Ministrisë së Arsimit, Dukagjin Pupovci, i cili atëkohë në mbledhjen e Komisionit për Mbikëqyrjen e Financave Publike, kishte theksuar se nga muaji shkurt, “MASHT do t’ua qesë pagat në zero 32 zyrtarëve të komunitetit serb, të cilët nuk kanë shkuar në punë asnjë ditë të vetme dhe kjo ministri ka shpenzuar nga buxheti i saj mbi 135 mijë euro për pagesat tyre”.
Vegëzat e artikullit të publikuar në portalin e dyshimtë “news426media.com” dhe “gazetaz.com”:
Në përmbajtje të artikullit të publikuar nga këto portale të dyshimta, në paragrafin e parë gjendet pretendimi i rremë “Sipas informacioneve jo zyrtare personat zyrtarë të qeverisë kane parë se si kryeministri i Kosovës Albin Kurti nuk ka pranuar takimin me Goran Rakiqin, për të cilin thuhet se ka dashur të ankohet te kryeministri për rastin e 32 serbëve ne MASHT”.
Se ky paragraf është komplet i sajuar, është vërtetuar nga hulumtimi i kryer nga hibrid.info, pasi është parë se në artikullin autentik të publikuar në “buletiniekonomik”, pjesa përmes së cilës bëhet ky pretendim i rremë nga këto portale të dyshimta, nuk gjendet fare. (shih këtu)
Ky artikull me titull dhe përmbajtje të rreme është shpërndarë edhe në Facebook nga faqet “Gazeta Arbëria” dhe “Specialja”. (shih këtu dhe këtu)
Nga hulumtimi i kryer, hibrid.info ka arritur të gjejë se ky artikull për herë të parë është publikuar me datën 14 shkurt 2022 nga portali tjetër i dyshimtë “timenews24hr.com”. (shih këtu)
Gjithashtu, një pretendim i tillë nuk është gjetur i publikuar në asnjë medium kredibil në Kosovë.
Analiza:
Në bazë të fakteve të trajtuar, rezulton që artikujt e publikuar me pretendimin se “Kurti ka përzënë Rakiqin nga zyra”, i publikuar nga portale të dyshimta, të jetë një sajim.
Duke iu referuar metodologjisë së hibrid.info, bënë që ky pretendim të vlerësohet si “lajm i rremë”, pasi që i gjithë pretendimi është i sajuar dhe nuk ka asnjë bazë.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
