Llogaria në median sociale Tiktok që mban emrin “Jongross” ka publikuar një video-material, në të cilin shfaqet imazhi i Naim Murselit, të arrestuarit të dyshuar për planifikimin e marrjes së jetës së Liridona Ademaj Murselit.
Në video-material gjendet mbishkrimi me anë të së cilit pretendohet se Murseli sot (16 dhjetor) është goditur me grushte nga dy të burgosur. (shih këtu)
Por pas hulumtimit dhe verifikimit të bërë nga hibrid.info përmes makinave online të kërkimit, nuk janë gjetur burime konkrete që vërtetojnë pretendimin e llogarisë së lartcekur.
Vegëza e postimit në TikTok nga llogaria “Jongross”:
https://www.tiktok.com/@jongross/video/7313135827972885793
Hibrid.info ka kërkuar në faqet zyrtare të Policisë së Kosovës dhe Shërbimit Korrektues të Kosovës për ndonjë njoftim lidhur me këtë pretendim, por nuk ka gjetur asnjë informacion që mbështet këtë pretendim. (shiko këtu dhe këtu)
Edhe me anë të makinës së kërkimit, “Google”, hibrid.info ka hulumtuar mbi pretendimin e publikuar nga llogaria në fjalë, por nuk ka gjetur burime që e mbështesin atë. (shih këtu)
Llogaria në TikTok, ditë më parë ka publikuar edhe një video-material tjetër me pretendimin e rremë se Murseli i ka dhënë fund jetës së tij, e që po ashtu ai postim është verifikuar nga hibrid.info. (shih këtu)
Analiza:
Një llogari në TikTok ka publikuar video-material që pretendon se Naim Murseli, i dyshuar për planifikimin e marrjes së jetës së Liridona Murselit, është sulmuar fizikisht në burg nga disa të burgosur.
Por pas verifikimit nga hibrid.info, pretendimi i bërë nga kjo llogari nuk është provuar.
Andaj bazuar edhe në metodologjinë e punës, hibrid.info e vlerëson këtë artikull si, “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
