Shkroi: Etrit Rexhepi
Publikohen artikuj që pretendojnë se janë shitur të gjitha biletat për ndeshjen e futbollit mes Zvicrës dhe Kosovës, që do të zhvillohet të premten nga ora 20:45 në “St. Jakob Park” në Basel, në kuadër të kualifikimeve për kampionatin botëror.
Përmbajtjet me këtë pretendim janë publikuar të enjten (4 shtator) nga disa media në gjuhën shqipe si: “klankosova.tv”, “koha.net”, “gazetaexpress.com” dhe “arbresh.info”.
Cila është e vërteta?
Hibrid.info ka gjetur se ende nuk janë shitur të gjitha biletat për këtë takim.
Hibrid.info ka vërejtur se pretendimi për shitjen e të gjitha biletave për ballafaqimin në mes Zvicrës dhe Kosovës, i publikuar nga disa prej mediave në gjuhën shqipe, është bazuar nga raportimi i gazetës zvicerane “Blick.ch” (shih këtu).
Hibrid.info ka hulumtuar dhe ka gjetur vegëzën e shitjes së biletave për këtë përballje dhe ka gjetur se deri në trajtimin e këtij pretendimi, ende ka bileta në shitje (shih këtu).
Nga harta e vendeve në stadium, shihet se ende ka bileta për shitje në sektorin e mysafirëve, aty ku do të vendosen shikuesit, që janë të ndarë nga vendet e përkrahësve të ekipeve në ndeshje.
Analiza:
Pretendimi se janë shitur të gjitha biletat për ndeshjen Zvicër–Kosovë nuk është i saktë.
Hibrid.info ka gjetur se ende ka bileta të disponueshme për sektorin e mysafirëve në stadium.
Bazuar në metodologjinë e punës, hibrid.info e vlerëson pretendimin si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.