Nuk ka numër telefoni, ku mund të paraqiten të papunët

Portali i dyshimtë “specialja.com” ka publikuar një artikull me titull “Kushdo që është pa punë le të lajmërohet në këtë numër, Kurti zotohet se nuk do të ketë të varfur”.

Pas verifikimit të bërë nga hibrid.info, del që titulli i këtij shkrimi është i sajuar, i cili nuk përputhet me përmbajtjen e tekstit.

Në përmbajtjen e këtij shkrimi nuk ka asnjë numër telefoni në të cilin mund të lajmërohen personat e papunë, siç pretendohet rrejshëm në titullin e këtij artikulli.

Lajmi është i vjetër, i publikuar në shkurt të këtij viti, dhe ka të bëjë me premtimin e kryeministrit Albin Kurti për eliminimin e varfërisë ekstreme në Kosovë, përgjatë kohës së qeverisjes së tij.

Teksti i artikullit të publikuar në “specialja.com”:

Kryetari i Lëvizjes Vetëvendosje, Albin Kurti, ka premtuar eliminimin e varfërisë ekstreme në Kosovë, përgjatë kohës së qeverisjes së tij.

Kurti ka thënë se përafërsisht 100 mijë qytetarë në vend jetojnë me më pak se 1 euro në ditë – kjo sipas tij është rezultat i drejpërdrejtë i korrupsionit dhe keqmenaxhimit. / Pak sekonda pas hapjes së marketingut shfaqen PAMJET EKSKLUZIVE

Vegëza e artikullit të publikuar në “specialja.com”:

Më poshtë mund të gjeni artikullin autentik të publikuar në kohë reale nga disa portale.

https://klankosova.tv/kurti-zotohet-se-do-ta-eliminoje-varferine-ekstreme-gjate-qeverisjes-se-tij/

https://www.syri.net/syri_kosova/politike-lajme/221604/kurti-flet-per-skemat-sociale-do-ta-eliminojne-varferine-ekstreme-dhe-korrupsionin/

Analiza:

Portali i dyshimtë “specialja.com” ka përdorur një deklaratë të vjetër të Kurtit të cilën është munduar ta paraqesë si lajm aktual. Të njëjtës i ka vënë titull të sajuar, duke pretenduar rrejshëm që brenda në tekst mund të gjendet një numër telefoni në të cilën mund të paraqiten personat e papunë.

Pas analizës së kontrollit të fakteve përmes metodologjisë së punës, hibrid.info e vlerëson këtë shkrim si “clickbait”.

Arsyetimi:

Vlerësimin “Clickbait” e marrin ato tekste titulli i të cilave nuk ka asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.