Shkroi: Etrit Rexhepi
Janë publikuar artikuj ku pretendohet për një aksident të rëndë të një autobusi nga Kosova në Serbi, nga i cili thuhet se një person ka humbur jetën dhe disa të tjerë kanë pësuar lëndime.
Pretendimi është publikuar të mërkurën (23 korrik) nga mediat online si: ”dukagjini.com”, “zëri.info”, “Lapsi info”, “botapress.info”, “drenicapress.org” dhe nga faqet në Facebook si “Lapsi info” dhe “Preshevacom”.
Çka nuk shkon me pretendimin?
Hibrid.info gjeti se nga aksidenti i raportuar nuk ka persona të vdekur dhe as të lënduar.
Hibrid.info ka hasur një postim të publikuar në faqen zyrtare në Facebook të kompanisë së autobusëve “Zhitia Tours”, autobusi i së cilës thuhet se është përfshirë në aksidentin e raportuar.
Në postimin e saj, kjo kompani ka mohuar të ketë pasur ndonjë aksident serioz me të vdekur dhe të lënduar (shih këtu).
Postimi në faqen e “Zhitia Tours” në Facebook:
“Pas disa spekulimeve rreth një aksidenti në Serbi ku disa portale shkruajnë se ka të vdekur e të lënduar të gjitha janë të pa vërteta.
Një nga 15 autobusët tanë që u nisën mbrëmë drejt Europës kishte një gërvishje apo aksident të lehtë kur pas 20 minutash i njejti vazhdoj rrugën për në destinacionin e tij , autobusi ishte i zbrazur pa pasagjerë në të ishin vetëm dy shoferët.
Ata të cilët postojn lajme të pa vërteta ju themi që jemi shumë të fortë e me spekulime e me asgjë tjetër nuk mund të na dëmtoni , populli e di që Zhitia flet të vërtetën.”
Analiza:
Pretendimi se në Serbi ka ndodhur një aksident i rëndë me një autobus nga Kosova, nga i cili një person ka mbetur i vdekur dhe disa të tjerë kanë pësuar lëndime, nuk qëndron.
Sipas sqarimit të kompanisë “Zhitia Tours”, autobusi i përfshirë në aksident nuk kishte udhëtarë, por se në të ndodheshin vetëm dy shoferët, e se nuk pati asnjë të lënduar apo viktimë.
Bazuar në metodologjinë e punës, hibrid.info e vlerëson pretendimin si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.
