Mediumi online me përmbajtje në gjuhën shqipe “kosovapost.net”, më 13 maj, ka publikuar një artikull, përmes së cilit pretendonte se, gjatë vizitës së tij në SHBA, kryeministri Albin Kurti do të takohet edhe me zëvendës-presidenten, Kamala Harris.
Këtë pretendim, ky medium e kishte bazuar në, siç shkruan në artikull, burime brenda Shtëpisë së Bardhë në Uashington.
Mirëpo, pas dhjetë ditëve, në kohën kur kryeministri Kurti ka përfunduar vizitën e gjatë 16 ditore në SHBA, rezulton se burimi i këtij mediumi ka qenë i pakonfirmuar dhe, si pasojë, rezulton të jetë i pavërtetë.
Artikulli i “kosovapost.net” i publikuar më 13 maj:
Kryeministri Albin Kurti, në fund të turit të vizitave në SHBA ishte takuar edhe me disa zyrtarë të lartë të shtetit, por jo edhe me zëvendësen e Presidentit Joe Biden.
Në postimin e bërë në profilin e tij në Facebook, Kurti kishte bërë një rezyme të takimeve në SHBA, duke përmendur një listë të personaliteteve të ndryshme të biznesit, të jetës publike dhe politike, pjesë e së cilës nuk ishte edhe zv.presidentja Harris.
Këtë postim Kurti e kishte bërë në kohën kur po udhëtonte nga SHBA për në Zvicër, për të qenë pjesëmarrës në forumin e Davos-it (këtu).
Analiza:
Pretendimi i bërë nga “kosovapost.net” rezulton të jetë i pasaktë.
Kontrolli i fakteve i bërë nga hibrid.info jep një rezultat që dëshmon se burimi nga i cili janë bazuar në shkrimin e këtij artikulli, ka qenë i pakonfirmuar.
Ky artikull, bazuar në metodologjinë e hibrid.info, merr vlerësimin si “përmbajtje e paverifikuar” dhe “lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
