Artikulli me titull “Ja dhe projekti i ri per qytetaret, do jepen nga 500 euro per secilin”, është publikuar nga portali i dyshimtë “mergimtarshqip.com”.
Pas verifikimit të fakteve, hibrid.info ka vërtetuar se titulli i këtij artikulli është përgjithësues, duke mos e qartësuar në fillim se autoritetet e cilit shtet kanë marrë një vendim të tillë.
Lajmi qartësohet vetëm në përmbajtje, ku bëhet e ditur se një vendim i tillë është ndërmarr nga shteti i Austrisë.
Në përmbajtje thuhet se, qeveria austriake ka prezantuar një paketë masash me vlerë gjashtë miliardë euro, e cila synon të ndihmojë qytetarët që përballen me rritjen e çmimeve. Tutje në atë lajm bëhet e ditur se ndihma financiare do të kap shifrën prej 500 euro për të gjithë qytetarët e atij vendi.
Vegëza e artikullit të publikuar në portalin e dyshimtë “mergimtarshqip.com”:
Ky artikull është shpërndarë edhe në Facebook nga faqja “Gazeta”, e cila numëron mbi 200 mijë ndjekës. (shih këtu)
Duke e ditur se ky portal i dyshimtë publikon artikuj që kanë të bëjnë me Kosovën dhe Shqipërinë, kjo mund të dezinformojë lexuesit duke i shtyrë që, përmes titullit, të gjykojnë se një vendim i tillë është marrë në ndonjërin nga këto shtete shqipfolëse.
Pas hulumtimit përmes makinave online të kërkimit, hibrid.info ka arritur të gjejë artikullin e publikuar në disa portale në gjuhën shqipe, të cilat kanë raportuar saktë lidhur me këtë vendim të shtetit austriak. (shih këtu dhe këtu)
Analiza:
Portali i dyshimtë “mergimtarshqip.com” ka publikuar një artikull lidhur me vendimin e Qeverisë së Austrisë, e cila ka prezantuar një paketë masash me vlerë gjashtë miliardë euro, që synon të ndihmojë qytetarët që përballen me rritjen e çmimeve.
Mirëpo, ky portal i dyshimtë, këtij artikulli i ka vënë titull përgjithësues, duke mos e bërë të qartë se cili shtet ka marrë një vendim të tillë.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
