Në mbledhjen e Këshillit të Sigurimit të OKB-së për Kosovën, të mbajtur dje (20 prill), përfaqësuesja e Rusisë, Anna Evstigneeva, gjatë fjalimit të saj ka pretenduar se numri i sulmeve kundër popullsisë serbe në Kosovë u dyfishua në vitin 2021 dhe vazhdon të rritet.
Pretendimet e ngritura gjatë fjalimit të Evstigneeva-s, janë publikuar edhe llogarinë zyrtare në Twitter të misionit të Rusisë në OKB. Në këtë llogari të quajtur “Russia at the United Nation” (Rusia në Kombet e Bashkuara), është postuar një pjesë e fjalimit të Evstigneeva-s ku pretendon pa fakte se ekzistojnë përpjekje që synojnë largimin e serbëve nga Kosova.
Gjithashtu, në këtë postim pretendohet se ka një qëllim nga Kosova që të shkatërrohet identiteti kulturor dhe fetar i serbëve, duke kërcënuar edhe objektet fetare dhe kulturore që janë trashëgimi në UNESCO (shih këtu).
Cicërima në Twitter e përkthyer në gjuhën shqipe:
Përpjekjet që synojnë të detyrojnë #serbët të largohen nga #Kosova vazhdojnë. Me sa duket, ka një qëllim për të shkatërruar identitetin e tyre kulturor dhe fetar. #Kishat Ortodokse, d.m.th. nga lista e trashëgimisë botërore të #UNESCO-s, janë nën një kërcënim të vazhdueshëm. Një prej tyre është Manastiri i Visoki Deçanit.
Pretendime të tilla lidhur se po bëhen sulme dhe grabitje me motive fetare e etnike ndaj objekteve fetare ortodokse në Kosovë, ka pasur edhe më herët nga Kisha Ortodokse Serbe dhe Qeveria e Serbisë, të cilat gjithashtu janë verifikuar nga hibrid.info.
Në maj të vitit 2021, përfaqësues të Kishës Ortodokse Serbe (KOS), kishin pretenduar se grabitjet në kishat ortodokse në Kosovë, kanë motiv etnik dhe fetar, por pa u bazuar në asnjë argument apo fakt. (shih këtu)
Gjithashtu, në shkurt të vitit 2022, Zyra për Kosovën në Qeverinë e Serbisë kishte lëshuar një komunikatë lidhur me grabitjen e tri kishave ortodokse në rrethinën e Zubin Potokut, që sipas tyre, përgjegjës për këtë është një person i komunitetit shqiptar.
Kjo zyrë është munduar që t’i paraqesë pa fakte si, siç thuhet në komunikatë, mesazhe politike të Prishtinës zyrtare ndaj komunitetit serb në Kosovë. (shih këtu)
Analiza:
Gjatë takimit të Këshillit të Sigurimit të mbajtur dje (20 prill) përfaqësuesja ruse, Anna Evstigneeva, në fjalimin e saj ka përmendur pa fakte se po vazhdojnë përpjekjet e Kosovës që të detyrojë serbët të largohen nga shteti kosovar.
Ajo pretendon në mënyrë të paargumentuar se Kosova ka qëllim që të shkatërrojë identitetin kulturor dhe fetar të serbëve, duke kërcënuar edhe objektet fetare dhe kulturore që janë trashëgimi në UNESCO.
Pas analizës së kontrollit të fakteve, hibrid.info e ka vlerësuar këtë deklaratë të përfaqësueses ruse si “Dezinformatë”, pasi e njëjta nuk ofron asnjë fakt që mbështet pretendimin e bërë.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
