Portali i dyshimtë me përmbajtje në gjuhën shqipe “ingazetaa.com” ka publikuar një artikull me titull “Vjen lajmi aspak i mirë, Rritet cmimi i energjisë, ja sa do të jetë tani”.
Pas verifikimit të fakteve, hibrid.info ka vërtetuar se titulli i këtij artikulli është i sajuar, i cili nuk i përgjigjet përmbajtjes.
Në përmbajtje gjendet një artikull i publikuar nga mediumi online në gjuhën shqipe “monitor.al”, në të cilin thuhet se çmimi i energjisë në bursën hungareze, që Shqipëria ka për referencë, ka kërcyer sërish në nivele të çmendura mbi 400 euro/MWh. (shih këtu)
Por, në këtë artikull nuk parashikohet rritje e çmimi i energjisë elektrike, siç pretendohet në titull.
Gjithashtu, edhe fotografia e publikuar në artikullin e portalit të dyshimtë “ingazetaa.com” nuk korrespodon me përmbajtjen, pasi në të shihet një faturë vjetër e energjisë elektrike e lëshuar nga një kompani për distribuim të energjisë elektirke në Kosovë, saktësisht KEDS-it.
Kjo lë të kuptohet se lajmi ka të bëjë direkt me shtrenjtimin e çmimit të energjisë elektrike në Kosovë.
Vegëza e artikullit të publikuar në portalin e dyshimtë “ingazetaa.com”:
Ky artikull është shpërndarë edhe në rrjetin social Facebook nga faqet “Gazeta”, “Gazeta Reale” dhe “Gazeta Ditore”.
Këtë artikull të “monitor.al” e ka publikuar edhe portali “Kosovo.energy”, por duke shtuar se përveç Shqipërisë edhe Kosova e ka në referencë bursën hungareze. Mirëpo, as në këtë artikull nuk përmendet se çmimi i energjisë elektrike në Kosovë do të rritet. (shih këtu)
Pas hulumtimit përmes makinave online të kërkimit, hibrid.info ka gjetur lajmet më të fundit që kanë të bëjnë me çmimin e energjisë elektrike.
Me datë 17 qershor 2022, Zyra e Rregullatorit për Energji (ZRRE) kishte deklaruar se Gjykata e Apelit ka vendosur të enjten që vendimi i Bordit të saj i marrë më 8 shkurt për tarifat, të mbetet në fuqi (shih këtu). Pra lajmi i fundit që është publikuar rreth zhvillimeve në këtë kontekst, nuk ndërlidhet fare me ndonjë rritje të planifikuar të çmimit të energjisë elektrike, siç pretendohet të paraqitet përmes titullit dhe fotografisë së këtij artikulli.
Analiza:
Portali i dyshimtë “ingazetaa.com” ka publikuar një artikull lidhur me çmimi i energjisë në bursën hungareze, i cili ka pësuar rritje.
Mirëpo, ky portal i dyshimtë këtij artikulli i ka vënë titull të përgjithësues, duke pretenduar të lë të kutphet se do të ketë rritje të çmimit të energjisë elektrike. Tjetër fakt që bën të mendohet se lajmi ka të bëjë direkt me Kosovën, është edhe fotografia e vendosur në këtë artikull, në të cilët paraqitet një faturë e vjetër e energjisë elektrike e një kompanie të distritribuimit të energjisë elektrike ne Kosovë.
Bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.