Portali i dyshimtë “konakushqiptar.com” ka publikuar një artikull me titull “LAJMI I FUNDIT/ PDK koalicion me LDK’në në Prishtinë?”.
Pas verifikimit të fakteve nga hibrid.info, është bërë e qartë se titulli i këtij artikulli është i sajuar, pasi nuk i përgjigjet përmbajtjes.
Në këtë artikull gjendet një deklaratë e kryetarit të Partisë Demokratike të Kosovës (PDK), Memli Krasniqit, i cili gjatë debatit në Pressin është pyetur se a do të ketë koalicion në Prishtinë në mes të PDK-së dhe LDK-së.
Krasniqi rreth një koalicioni të mundshëm mes PDK’së dhe LDK’së në Prishtinë, tha se për këtë duhet një diskutim me Uranin.
“Duhet të jetë një diskutim më Uranin, ajo që e di si një peron që jeton këtu i vynë një energji e re një ngjyrë e re. Duhet me shiku, normal që kam me votu në raundin e dytë si qytetarë i përgjegjshëm. Prishtinës i duhet një ndryshim”, tha Krasniqi.
Pra, nuk është e vërtetë se është arritur ndonjë koalicion mes PDK-së dhe LDK-së, siç paraqitet rrejshëm në titullin e artikullit të publikuar nga “konakushqiptar.com”.
Vegëza e artikullit të publikuar në “konakushqiptar.com”:
I njëjti artikull me titull të sajuar është shpërndarë edhe në Facebook nga faqja “Gazeta Aktive”, e cila numëron mbi 90 mijë ndjekës.
https://m.facebook.com/story.php?story_fbid=241857977984227&id=100064800784275
Hibrid.info gjatë hulumtimit përmes makinave të kërkimit dhe rrjeteve sociale, ka gjetur këtë artikull të publikuar nga disa media online në Kosovë, vegëzat e të cilit mund t’i gjeni më poshtë.
http://gazetablic.com/a-do-te-bej-pdkja-koalicion-me-ldkne-ne-prishtine-pergjigjet-memli-krasniqi/
Analiza:
Portali i dyshimtë “konakushqiptar.com” ka publikuar një artikull, të cilit i ka vënë titull të rremë se gjoja PDK dhe LDK kanë arritur koalicion në Prishtinë, e qe një gjë e tillë nuk përmendet në përmbajtje.
Në artikull gjendet vetëm një deklaratë e kryetarit të PDK-së, Memli Krasniqi, i cili ka thënë se lidhur me një koalicion të mundshëm mes këtyre dy subjekteve politike, duhet të bisedohet me Urani Ismailin, i cili në zgjedhjet e 17 tetorit garoi për kryetar të Prishtinës.
Pas analizës së kontrollit të fakteve, hibrid.info e ka vlerësuar këtë artikull si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
