Mediumi online “indeksonline.net”, në faqen e tij zyrtare në Facebook, ka publikuar më 31 korrik 2026 një video-material me mbishkrimin “Provokon Serbia, aeroplanët luftarakë fluturojnë mbi Jarinje”.
E njëjta përmbajtje më pas u publikua edhe nga një faqe tjetër në Facebook “Kosova News” (shih këtu).
Çka nuk shkon me këtë përmbajtje?
Pas verifikimit të fakteve, u vërtetua se kjo video është e vjetër.
FAKTET
Hibrid.info duke përdorur programin e automatizuar “InVID”, ka gjetur se kjo video fillimisht është publikuar në vitin 2021 (shih këtu dhe këtu)
Kush e riktheu këtë video të vjetër?
Në videomaterialin e publikuar nga “Indeks Online”, shihet emri i një llogarie në TikTok, “luckystrike093”, e cila publikon përmbajtje në gjuhën serbe. Hibrid.info arriti ta gjente këtë videomaterial në këtë llogari (shih këtu).
Kjo llogari e publikoi përmbajtjen më 12 korrik. Më pas “Indeks Online” dhe “Kosova News” të njëjtën përmbajtje e publikuan më 31 korrik, duke e paraqitur atë si një ngjarje aktuale.
Pse trajtohet kjo përmbajtje?
Videoja e publikuar në Facebook nga “Indeks Online”, deri në shkrimin e këtij artikulli, ka arritur të grumbullojë mbi 3 mijë e 900 reagime, 102 shpërndarje dhe mbi 2 mijë e 900 komente (shih këtu).
Ndërsa, faqja tjetër “Kosova News” ka grumbulluar 82 reagime e 101 komente (shih këtu).
Bazuar në komentet në këto dy publikime, vërehet se shumica e komentuesve i kanë konsideruar këto pamje si aktuale.
Analiza
Një video e publikuar më 31 korrik nga faqet e Facebook-ut të Indeks Online dhe Kosova News, me pretendimin se aeroplanë luftarakë serbë po fluturonin mbi Jarinjë, rezulton të jetë e vjetër.
Verifikimi i Hibrid.info, përmes mjetit InVID, tregoi se pamjet janë publikuar fillimisht në vitin 2021.
Videoja u ripublikua më 12 korrik nga një llogari në TikTok që publikon përmbajtje në gjuhën serbe, ndërsa më 31 korrik u paraqit nga këto faqe si ngjarje aktuale. Publikimet kanë marrë mijëra reagime dhe komente, ndërsa shumë përdorues i kanë konsideruar pamjet si të reja
Bazuar në metodologjinë e punës, hibrid.info e vlerëson këtë përmbajtje si të “pa verifikuar”.
Arsyetimi
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.