Mediumi në gjuhën shqipe “Albanianpost.com” më 18 shtator ka publikuar një artikull në të cilën parashihet një skenar dhe epilog i dialogut mes Kosovës dhe Serbisë.
Në artikullin e publikuar nga mediumi në gjuhën shqipe pretendohet për një dokument katër faqesh ku shpaloset një “kornizë e re” e dialogut Kosovë-Serbi, në të cilën thuhet se marrëveshja përmbajtësore do të arrihet vitin e ardhshëm ndërsa ajo finalja pas 10 vjetësh. Sipas këtij dokumenti, që “Albanianpost.com” pretendon që ekziston, Kosova fiton njohje nga 5-shja e BE-së dhe anëtarësim organizata ndërkombëtare, ndërsa Serbia ndihma masive financiare.
Dokumenti i pretenduar ku zë vend “korniza e re” për marrëveshjen finale ndërmjet Kosovës dhe Serbisë dhe ku janë të përfshira tri palë, është siguruar nga, siç e thekson mediumi, burimet që i posedojnë. Përkundër faktit që dokumenti është siguruar nga siç thuhet, burimet e mediumit, nuk është kërkuar konfirmimi i palëve të përfshira në këtë dokument.
Vegëza e artikullit të publikuar në “Albanianpost.com”:
Pjesë të artikullit të publikuar në “Albanianpost.com”:
Në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht. Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE.
Ky është plani i paraqitur në kornizën e re për marrëveshje në mes të Kosovës e Serbisë, i përpiluar pas angazhimit të këshilltarëve të presidentit Emmanuel Macron dhe kancelarit Olaf Scholz, të cilin e ka siguruar Albanian Post.
Me marrëveshjen e vitit të ardhshëm (nëse pranohet propozimi) Kosovën e pranojnë edhe pesë shtetet që akoma nuk e kanë njohur të Bashkimit Evropian, kurse Serbia do të përfitojë një ndihmë masive financiare, asistencë ekonomike dhe do njihet si fuqia e rajonit.
Mediumi në gjuhën shqipe pretendon se “korniza e re”, u është prezantuar Albin Kurtit e Aleksandër Vuçiq-it, e që në fakt, publikisht, e ka pranuar vetëm presidenti serb Vuçiq pas vizitës së dy këshilltarëve në Beograd.
Presidenti serb deklaron se letrën e ka pranuar dhe lexuar për një periudhë të shkurtër dhe se e din përmbajtjen por jo dhe detajet e shpalosura në letër. (këtu)
Pjesë e deklaratës së presidentit serb Aleksandër Vuçiq në lidhje me dokumentin:
“E lexova atë letër. Duke ditur se çfarë do të ndodhte, refuzova ta pranoj. Nuk mund të them se mbaj mend katër faqe pas pesëmbëdhjetë minutash leximi. Është e qartë se njoftimi nuk ka ardhur nga pala serbe. Se a është publikuar nga shqiptarët apo dikush tjetër, sepse i shkon për shtat të përdoret nga mediat, nuk më intereson. Pavarësisht nëse është plotësisht e vërtetë apo jo, nuk mund të mbaj mend çdo detaj, por unë e di se cilat ishin idetë e dikujt”.
Qeveria gjermane, njëra nga palët e përfshira në dokumentin e cekur, bazuar në një deklaratë të zëdhënësit të qeverisë për “Gazetën Express” kanë demantuar se qëndrojnë prapa një dokumenti katër faqesh si “kornizë e re” për dialogun në mes të Kosovës dhe Serbisë, që u raportua nga “Albanianpost” se iu dorëzua Kurtit dhe Vuçiqit përmes dy këshilltarëve të Macron-it dhe Scholz-it, përgjatë vizitës në Prishtinë dhe Beograd bashkë me emisarin e BE-së për dialogun Kosovë-Serbi, Miroslav Lajçak. Bazuar në deklaratën dhënë “Gazetës Express” Berlini zyrtar thotë se një letër e tillë nuk vjen nga Franca, Gjermania, apo përfaqësuesi special dhe nuk ka informacione kush e ka shpikur këtë letër dhe me çfarë qëllimi. (këtu)
Analiza:
Mediumi në gjuhën shqipe “Albanianpost” ka hedhur pretendim për një dokument në të cilën përfshihet një “kornizë e re” e cila do të shpie deri te marrëveshja finale ndërmjet Kosovës dhe Serbisë. I njëjti dokument pretendohet se është hartuar nga Gjermania, Franca dhe Bashkimi Evropian dhe i është prezantuar kryeministrit të Kosovës, Albin Kurti dhe presidentit të Serbisë, Aleksandër Vuçiq, përmes Jens Plotner – këshilltarit kryesor në politikën e jashtme të kancelarit gjerman, dhe atij të presidentit të Francës, Emmanuel Bonne.
Njëra nga palët e përfshira në dokumentin e pretenduar, Gjermania e ka demantuar ekzistencën e një letre të tillë të shpallur nga Franca, Gjermania dhe Përfaqësuesi Special i BE-së.
Bazuar në metodologjinë e punës, hibrid.info vlerëson se pretendimi për ekzistencën e një dokumenti për marrëveshjen finale ndërmjet Kosovës dhe Serbisë është “i pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
