Portali i dyshimtë me përmbajtje në gjuhën shqipe “xnews7.com” ka publikuar dje (20 shkurt) një artikull me titull “LAJM I FUNDIT: Tri shpërthime të fuqishme në Veri”.
Në përmbajtje të artikullit thuhet granatat e dorës dyshohet se janë gjuajtur tek Qendra për kontrollin e veturave dhe Car Lazari, në Mitrovicë të Veriut.
Pas verifikimit të fakteve të kryer nga hibrid.info, është vërtetuar se lajmi është i vjetër dhe ka të bëjë me një ngjarje të ndodhur në nëntor të vitit të kaluar.
Vegëza e artikullit të publikuar në portalin e dyshimtë “xnews7.com” me datë 20 shkurt:
Ky artikull i publikuar nga portali i dyshimtë, është shpërndarë edhe në Facebook nga faqe si “Shqiptaria Ka Emër”, “Tringa Globale”, “Maringlen”, “Gazeta Rich Shqip”, “Liria Ka Emër”, e “Desi News”.
Pas hulumtimit përmes makinave online të kërkimit, hibrid.info ka arritur të gjejë artikullin autentik të publikuar në kohë reale (19 nëntor 2023) nga portali informativ “Koha.net”, i cili edhe citohet në përmbajtjen e publikuar nga portali i dyshimtë “xnews7.com”. (shih këtu)
Incidenti i fundit i raportuar në media u publikua me datë 16 janar, ku dy persona ishin lënduar pas shpërthimit të një granate dore në afërsi të një hoteli në Mitrovicë të Veriut. (shih këtu dhe këtu)
Analiza:
Përmes një lajmi të vjetër të nëntorit 2023 lidhur me shpërthime në Veri të Kosovës, u pretendua rrejshëm se i njëjti ka ndodhur dje (20 shkurt).
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.