Llogaria në TikTok që mban emrin “sherbimisekret1945” ka publikuar me datë 23 dhjetor një video-material, duke i vendosur mbishkrimin me anë të së cilit pretendohet se sipas Policisë së Kosovës, në veri të vendit janë vrarë tre policë.
Hibrid.info ka verifikuar pretendimin dhe nuk e ka gjetur të konfirmuar në burimet zyrtare.
Vegëza e video-materialit të publikuar në TikTok nga llogaria “sherbimisekret1945”:
https://www.tiktok.com/@sherbimisekret1945/video/7315504721739975968
Hibrid.info ka siguruar raportin 24 orësh nga Policia e Kosovës, për datën në të cilin edhe është publikuar pretendimi i video-materialit në fjalë.
Në këtë raport, ku janë të përfshira informatat për drejtoritë rajonale të Policisë së Kosovës mbi Mitrovicën e Jugut dhe atë Veriut, nuk konfirmohet pretendimi i llogarisë në fjalë. (shih fotografinë më poshtë)
Ndërkaq edhe me anë te hulumtimit në makinën e kërkimit “Google”, hibrid.info nuk ka e ka gjetur të konfirmuar pretendimin e dhënë nga llogaria “sherbimisekret1945” (shih këtu).
Hera e fundit kur një rast i vrasjes së pjesëtarëve të Policisë, ka ndodhur në rajonin e Mitrovicë, është data e 24 shtatorit, kur u vra rreshteri i Policisë së Kosovës, Afrim Bunjaku (shih këtu dhe këtu).
Analiza
Një llogari në TikTok ka publikuar një video-material me anë të së cilit pretendohet se janë vrarë tre policë në Mitrovicë, sipas Policisë së Kosovës.
Hibrid.info ka hulumtuar dhe bazuar në raportin 24 orësh të Policisë, nuk e ka gjetur të konfirmuar pretendimin.
Andaj edhe bazuar në metodologjinë e punës, hibrid.info e vlerëson këtë video-material, si “Lajm i rremë”.
Arsyetimi
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.