Një llogari në Facebook që mban emrin “Mesxhid El-Aksa” ka publikuar dje (6 nëntor) një video-material, me anë të cilit pretendohet se shfaqen pamje të trupave të palestinezëve të vrarë në Gaza që kanë mbetur në rrugë për shkak të spitaleve të mbushura atje.
Por pas verifikimit të fakteve nga hibrid.info është gjetur se pamjet janë marrë nga një protestë në Washington, në të cilën janë ekspozuar thasë të bardhë si përfaqësim i trupave të njerëzve të vrarë në Gaza nga Izraeli.
Vegëza e video-materiait të publikuar në Facebook nga llogaria “Mesxhid El-Aksa”:
Pas hulumtimit përmes programit të automatizuar “InVID”, hibrid.info ka gjetur një artikull nga mediumi “fox9.com” me datë 5 nëntor, ku tregohet për një protestë pro-palestineze në Washington (shih këtu).
Në këtë artikull shfaqen edhe imazhet e thasëve të bardhë të ekspozuar të cilët sipas protestuesve reprezentojnë trupat e njerëzve të vrarë në Gaza nga Izraeli. Të njëjtat imazhe janë shfaqur edhe në video-materialin e publikuar nga llogaria “Mesxhid El-Aksa”, me mbishkrimin e pretenduar.
FOTOGRAFITË KRAHASUESE
Edhe një artikull tjetër i gjetur nga “hibrid.info”, raporton për protestën pro-palestineze të 4 nëntorit të mbajtur në Washington (shih këtu).
Analiza:
Një llogari në Facebook ka publikuar video-material me pamje të një proteste pro-palestineze në Washington.
Thasët e bardhë të ekspozuar si reprezentim i njerëzve të vdekur në Gaza, në këtë protestë, autori i ka pretenduar rrejshëm se janë trupat e palestinezëve të vrarë, të mbetur në rrugë si shkak i spitaleve të mbushura në Gaza.
Andaj, bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
