Portali i dyshimtë me përmbajtje në gjuhën shqipe “a.news29media.com” dje (13 shtator) ka publikuar një artikull me titull “EKSKLUZIVE / Vucic eshte pro dialogut me Kosoven per njohjen e shtetit te Kosoves”.
Pas verifikimit të fakteve të kryer nga hibrid.info, është vërtetuar se titulli i këtij artikulli është i sajuar që nuk i përgjigjet përmbajtjes.
Në përmbajtje thuhet se Presidenti i Serbisë, Aleksandër Vuçiç, duke iu drejtuar deputetëve në seancën e posaçme të Kuvendit për Kosovën, kishte thënë se nuk do ta njohë Kosovën drejtpërdrejt apo tërthorazi dhe as nuk do të heqë dorë nga lufta legjitime për interesat kombëtare dhe të drejtën ndërkombëtare.
Pra, nuk është e vërtetë që Vuçiq ka thënë se është pro dialogut për njohjen e shtetit të Kosovës, ashtu siç pretendohet në titull.
Vegëza e artikullit të publikuar në portalin e dyshimtë “a.news29media.com”:
Pas hulumtimit të kryer përmes makinave online të kërkimit, hibrid.info ka gjetur artikullin autentik të publikuar në “Euronews Serbia” (këtu), dhe i përkthyer në gjuhën shqipe nga “Euronews Albania” (këtu).
Portali i dyshimtë “a.news29media.com” ka marrë këtë artikull të publikuar në “Euronews”, të cilit më pas i ka vënë titull të sajuar.
Analiza:
Portali i dyshimtë “a.news29media.com” ka publikuar një artikull me deklaratën e presidentit serb Aleksandër Vuçiq, i cili ishte shprehur se nuk do ta njohë Kosovën drejtpërdrejt apo tërthorazi.
Ky portal i dyshimtë këtij artikulli i ka vënë titull të rremë me pretendimin se Vuçiq ka thënë se është pro dialogut për njohjen e shteti të Kosovës.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
