Shkroi: Fatbardh Dema
Të dielën (26 tetor), faqja “Fushë Kosova Lajm” (arkivuar) në Facebook publikoi një video-material 26 sekonda, përmes së cilës pretendohet se kandidati për kryetar të Fushë Kosovës nga radhët e Lidhjes Demokratike të Kosovës (LDK), Besnik Osmani, nuk përfaqëson LDK-në, pasi i njëjti ishte zgjedhur auditor i përgjithshëm nga Xhavit Haliti, i cili vjen nga Partia Demokratike e Kosovës (PDK).
E vërteta?
Pas verifikimit të fakteve të kryer nga hibrid.info, u vërtetua se pretendimi është i rremë.
Pas hulumtimit të kryer online, hibrid.info gjeti se me datë 3 mars 2016, ish-presidentja e Kosovës, Atifete Jahjaga, i kishte propozuar Kuvendit të Republikës së Kosovës, Besnik Osmanin, kandidat për Auditor të Përgjithshëm të Republikës së Kosovës. (shih këtu)
Hibrid.info ka gjetur edhe video-materialin autentik të publikuar nga mediumi “Kallxo.com” me datë 30 mars 2016. Në këtë përmbajtje, Xhavit Haliti (atëkohë kryetar i Kuvendit të Kosovës), sqaroi se Kuvendi zgjodhi Besnik Osmanin si Auditor të Përgjithshëm me 76 vota për, 3 kundër dhe 1 abstenim.
Po ashtu, hibrid.info gjeti artikuj të publikuar më 30 mars 2016 në disa media online në Kosovë, që raportuan zgjedhjen e Osmanit si Auditor të Përgjithshëm të Republikës së Kosovës. (shih këtu dhe këtu)
Analiza:
Faqja “Fushë Kosova Lajm” publikoi një video ku pretendohej se kandidati i LDK-së për kryetar të Fushë Kosovës, Besnik Osmani, nuk përfaqëson këtë parti, me arsyetimin se ishte zgjedhur Auditor i Përgjithshëm nga Xhavit Haliti i PDK-së.
Pas verifikimit të fakteve u vërtetua se ish-presidentja Atifete Jahjaga ishte ajo që e propozoi Besnik Osmanin për postin e Auditorit të Përgjithshëm më 3 mars 2016. Më pas, më 30 mars 2016, Kuvendi i Kosovës e zgjodhi atë me 76 vota për, 3 kundër dhe 1 abstenim, siç e konfirmon edhe videoja autentike e publikuar nga “Kallxo.com”.
Edhe disa portale informative në Kosovë raportuan për këtë vendim në të njëjtën datë, duke vërtetuar se procesi i zgjedhjes së Osmanit nuk lidhet me ndonjë vendim të Xhavit Halitit apo të Partisë Demokratike të Kosovës.
Bazuar në metodologjinë e punës, hibrid.info e vlerëson përmbajtjen e publikuar nga faqja “Fushë Kosova Lajm” si “Manipulim i fakteve” dhe “Dezinformatë”.
Arsyetimi:
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.