Disa portale informative në gjuhën shqipe kanë publikuar me datë 8 tetor një artikull me titull “’Dërgoni ushtarë turq në Gaza’, protesta në Stamboll në mbështetje të palestinezëve”.
Pas verifikimit të fakteve të kryer nga hibrid.info, është vërtetuar se video-materiali që paraqet protestuesit në Turqi duke brohoritur “dërgoni ushtarët tanë në Gaza”, është e vjetër, e realizuar në maj të vitit 2021.
Vegëza e artikullit të publikuar në portalet informative “Eurojournal-alb.com” dhe “Abcnews.al”:
Në përmbajtje të këtyre artikujve gjenden postime nga disa llogari në median sociale X (ish-Twitter), të cilat e kanë paraqitur këtë protestë të vjetër si aktuale.
Pra, mediat e lartcekura duket se kanë rënë pre e këtyre publikimeve. (shih këtu dhe këtu)
Pas verifikimit të fakteve të kryer përmes programit të automatizuar “InVID”, hibrid.info ka arritur të gjejë video-materialin e njëjtë të publikuar në maj të vitit 2021 nga mediumi turk “Muslim Port” në llogarinë e tij zyrtare në X (ish-Twitter). (shih këtu)
Protestat e vitit 2021 ndodhën pas sulmeve ajrore të ushtrisë izraelite në Gaza, para Konsullatës së Përgjithshme izraelite në Stamboll me thirrjet “Ushtarët turq në Gaza”. (shih këtu)
Analiza:
Disa portale informative kanë publikuar video me pamje të një proteste të vitit 2021 me pretendimin të paraqitet si aktuale, duke e ndërlidhur me konfliktin e tetorit 2023 ndërmjet Izraelit dhe Hamasit.
Bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
