Disa portale të dyshimta kanë publikuar një artikull me titull të rremë, duke pretenduar se presidenti serb Aleksandër Vuçiq ka thënë se “Do ta njohim Kosovën me një kusht, nëse kryeministri i Kosovës do të jetë serb”.
Kjo u vërtetua pas verifikimit të fakteve nga hibrid.info, pasi titulli nuk përputhet me përmbajtjen.
Në tekst gjendet një lajm i vjetër i publikuar në janar të vitit 2021 që ka të bëjë me një deklaratë të presidentit serb, i cili ishte shprehur se beson se do të ketë vazhdim të dialogut dikur, përkundër deklaratave, siç ishte shprehur, jo përgjegjëse si ajo e krijimit të “Shqipërisë së madhe”, që vijnë nga politikanët shqiptar.
Pra, nuk është e vërtetë se Vuçiq është shprehur se Serbia do ta njohë Kosovën, vetëm nëse kryeministri i saj do të jetë serb.
Vegëzat e artikullit të publikuar në portalet e dyshimta si “banglarreporter.com” dhe “konakushqiptar.com”:
Ky artikull është shpërndarë edhe në rrjetin social Facebook nga faqet si “Gazeta Aktive” dhe “Gazeta Arbëria”, të cilat në këto postime kanë grumbulluar numër të madh komentesh e reagimesh. (shih këtu dhe këtu)
Pas hulumtimit të kryer nga hibrid.info, është gjetur artikulli autentik i publikuar në gjuhën shqipe dhe në kohë reale nga portali “botasot.info”. (shih këtu)
Ky artikull me titull të sajuar është shpërndarë edhe më herët në muajin dhjetor të vitit 2021 nga një portal tjetër i dyshimtë, i cili poashtu është verifikuar nga stafi i hibrid.info. (shih këtu)
Analiza:
Portalet e dyshimta “banglarreporter.com” dhe “konakushqiptar.com” kanë publikuar një artikull të vjetër të cilin janë munduar ta paraqesin si aktual duke i vënë titull të rremë.
Pas analizës së kontrollit të fakteve bazuar në metodologjinë e punës, hibrid.info e ka vlerësuar këtë artikull si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.