Faqja në Facebook “KOHA E RE” (dje 31 gusht) ka publikuar një artikull me titull “Albin Kurti sot para te gjitheve shpalosi sekretin me te madh Kosovar qe nga viti 1999 – ‘Te koordinuara nga Thaci dhe Vuciq’”.
Pas verifikimit të fakteve, hibrid.info ka vërtetuar se titulli i këtij artikulli është i sajuar dhe nuk i përgjigjet përmbajtjes.
Në përmbajtje gjendet lajm i vjetër, i publikuar në qershor të vitit 2021, atëkohë kur Kryeministri i Kosovës, Albin Kurti, në seancë e Kuvendit në prag të takimit me presidentin serb Aleksandër Vuçiq, kishte kritikuar qeveritë e kaluara në raport me qasjen që kanë pasur në dialog, duke thënë se janë bërë incidente në terren të kontrolluara mes palëve negociuese siç ishte arrestimi mbase i orkestruar i Gjuriqit e të ngjashme.
Pra, nuk ka asnjë sekret të shpalosur nga Kurti, siç pretendohet rrejshëm në titullin e këtij artikulli.
Vegëza e artikullit të publikuar në faqen “KOHA E RE” në Facebook:
Ky artikull me titull të sajuar është publikuar më 12 qershor nga portali dyshimtë me përmbajtje në gjuhën shqipe “news426media.com”.
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar në kohë reale (11 qershor) në disa media online. (shih këtu, këtu dhe këtu)
Analiza:
Faqja në Facebook me emrin “KOHA E RE” ka publikuar një artikull të vjetër të vitit 2021, të cilin është munduar ta paraqesë si aktual, duke i vënë titull të sajuar.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.