Shkroi: Fatbardh Dema
“Nuk po gjen qetësi vendi! Çfarë po ndodh, tre tërmete të njëpasnjëshëm godasin brenda pak minutave”, mban titullin një artikull.
Ky artikull u publikua dje (3 shtator) në Facebook nga faqja me përmbajtje në gjuhën shqipe “Preferenca”.
Çka nuk shkon me këtë artikull?
Pas kontrollit të fakteve të kryer nga hibrid.info, u vërtetua se lajmi është i vjetër dhe në titull nuk sqarohet se bëhet fjalë për tërmet të ndodhur në Greqi.
Vegëza e postimit të publikuar në Facebook nga faqja “Preferenca”:
Artikulli i postuar në Facebook nga faqja e lartcekur, fillimisht u publikua më 7 gusht në portalin “versus.al”. (shih këtu)
Për të vërtetuar edhe më shumë faktin se tërmetet janë regjistruar në Kretë të Greqisë me datë 7 gusht, hibrid.info ka arritur të gjejë artikuj të publikuar në media të huaja që kanë raportuar për këtë ngjarje. (shih këtu dhe këtu)
Analiza:
Faqja nw Facebook ”Preferenca” ka publikuar një artikull të vjetër (7 gusht) në lidhje me tërmetet e regjistruara në Greqi, duke e paraqitur si aktual. Gjithashtu, në titull nuk sqarohet se në cilin vend ka ndodhur ngjarja.
Mos qartësimi i vendndodhjes së ngjarjes në titull nga kjo faqe, mund të qojë deri te dezinformimi i lexuesve, duke lënë hapësirë të nënkuptohet se tërmetet kanë ndodhur në një nga hapësirat shqip-folëse.
Andaj edhe bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.