Shkroi: Etrit Rexhepi
Publikohet një imazh që shfaq një vend të përfshirë nga flakët, për të cilin pretendohet se paraqet Izraelin.
Fotografia me këtë pretendim është publikuar dje (1 maj) nga një faqe në Facebook, me emrin “Kronika.com”.
Çka nuk shkon me përmbajtjen?
Hibrid.info ka gjetur se kjo fotografi është gjeneruar me Inteligjencë Artificiale (IA).
Hibrid.info ka hulumtuar me anë të programit të automatizuar të kërkimit, “InVID” dhe ka gjetur se kjo fotografi me këtë pretendim është publikuar nga disa faqe e llogari në media të ndryshme sociale (shih këtu).
Por, rezultatet nga ky kërkim, kanë gjetur video të publikuar në janar, prej së cilës është shkëputur kjo fotografi, me pretendimin se shfaqte përhapjen e zjarrit në Los Anxheles (shih këtu).
Për të konfirmuar vërtetësinë e pamjeve, hibrid.info ka verifikuar fotografinë dhe videon përmes “Hivemoderation”, platformës e cila kontrollon nëse përmbajtjen janë të gjeneruara nga IA.
Në të dy rastet rezultatet kanë treguar se përmbajtja është gjeneruar nga kjo teknologji.
Tutje, hibrid.info ka gjetur artikuj të publikuar nga mediat në gjuhë të huaja të cilat kanë raportuar për përhapjen e madhe të zjarrit në Jeruzalem të Izraelit (shih këtu, këtu, këtu dhe këtu).
Gjë e cila konfirmon ndodhjen e kësaj ngjarje në Izrael, por që në këtë rast zjarret janë paraqitur me fotografi të gjeneruar nga IA.
Analiza:
Pretendimet për përhapje zjarri në Izrael janë të sakta.
Por, në fotografinë e trajtuar, ato janë paraqitur përmes pamjeve të gjeneruara nga IA.
Bazuar në metodologjinë e punës, hibrid.info e vlerëson përmbajtjen si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
