Shkroi: Etrit Rexhepi
Është publikuar një imazh me mbishkrimin që pretendon se Shtetet e Bashkuara të Amerikës (ShBA) kanë dhuruar shtatë dronë për Policinë e Kosovës.
Kjo përmbajtje është publikuar dje në TikTok nga llogaria me emrin “rejas04”.
Çka nuk shkon me përmbajtjen?
Hibrid.info ka gjetur se përmbajtja është e saktë, por që informon për një ngjarje të ndodhur vitin e kaluar, gjë e cila nuk bëhet e ditur në këtë publikim.
Në bazë të komenteve të postuara në këtë publikim, hibrid.info vlerëson se ky informacion mund të merret si aktual nga audienca.
Duke qenë se imazhi duket të jetë publikuar nga mediumi online “indeksonline.net”, hibrid.info ka hulumtuar publikimet e këtij mediumi.
Gjetjet e hibrid.info tregojnë se “indeksonline.net” e ka publikuar imazhin në fjalë, më 11 tetor të vitit 2023.
Hibrid.info ka hulumtuar edhe përmes makinave të kërkimit, duke gjetur disa artikuj të publikuar edhe nga mediat e tjera në gjuhën shqipe, që tregojnë se kjo ngjarje ka ndodhur vitin e kaluar (shih këtu, këtu dhe këtu).
Analiza:
Pretendimi se ShBA-ja ka dhuruar shtatë dronë për Policinë e Kosovës, është i saktë.
Por, ngjarja ka ndodhur në vitin e kaluar, gjë e cila nuk bëhet e ditur në përmbajtjen e trajtuar.
Çka do të thotë se kjo ngjarje e vjetër në këtë rast, është munduar të paraqitet si aktuale. Andaj bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.