Disa media në gjuhën serbe kanë publikuar dje (12 mars) një artikull rreth thyerjes dhe grabitjes së shtëpisë së banorit serb në Kosovë, me pretendimin të paraqitet si veprim i motivuar etnikisht.
Përpjekja për ta paraqitur grabitjen në shtëpinë qytetarit Dragisha Miriqit, në fshatin Batushë afër Fushë Kosovës si incident ndëretnik është bërë përmes një njoftimi të Zyrës për Kosovën në Qeverinë e Serbisë.
Në njoftimin e këtij institucioni akuzohet Prishtina zyrtare që, siç thuhet, si “pasojë e drejtpërdrejtë e mesazheve të politikanëve të papërgjegjshëm nga Prishtina, të cilët mbjellin urrejtje ndaj çdo gjëje serbe dhe me politikën e mosndëshkimit” po i, siç pretendohet, “stimulojnë huliganët dhe nxisin sulme të reja që synojnë të krijojnë trazira te serbët”.
Edhe pse nuk dihen kryesit e veprës, ky institucion serb pretendon pa fakte se ky veprim është duke i bërë kështu banorët serbë “objektiv të huliganëve dhe keqbërësve shqiptarë”.
Vegëza e artikujve të publikuar në disa media në gjuhën serbe:
https://informer.rs/vesti/politika/777837/kancelarija-kosovo-metohiju-napad-pljacka-kosovo-polje
Vegëza e deklaratës së Zyrës për Kosovën:
https://www.kim.gov.rs/v5091.php
Pjesë të artikujve të publikuar në disa media në gjuhën serbe:
ZYRA për Kosovë dhe Metohi vlerësoi se incidentet si ai në fshatin Batushë afër Kosovës Fushë, ku ishte thyer dhe grabitur shtëpia e Dragisha Miriqit, derisa ai ishte jashtë shtëpisë së tij, vetëm kontribuojnë në faktin se serbët si ata, rreth 300 prej të cilëve jetojnë në këtë fshat, ndihen të pasigurt dhe si objektiv i huliganëve dhe keqbërësve shqiptarë.
Pjesë të reagimit të Zyrës për Kosovën:
Në fshatin Batuse të Kosovës Fushë, mbrëmë është thyer dhe grabitur shtëpia e Dragisha Miriqit, derisa ai ndodhej jashtë shtëpisë së tij. Rreth 300 serbë jetojnë sot në këtë fshat serb dhe incidente të tilla vetëm sa i bëjnë ata të ndihen të pasigurt dhe objektiv të huliganëve dhe keqbërësve shqiptarë.
Sulmet e vazhdueshme ndaj serbëve janë pasojë e drejtpërdrejtë e mesazheve të politikanëve të papërgjegjshëm nga Prishtina, të cilët mbjellin urrejtje ndaj çdo gjëje serbe, dhe me politikën e mosndëshkimit u japin erën huliganëve dhe nxisin sulme të reja që synojnë të krijojnë trazira te serbët.
Për rastin e ndodhur në fshatin Batushë të Fushë Kosovës, Zyra për Kosovën nuk ofron fakte konkrete rreth ngjarjes dhe pretendimit për motivimin e këtij akti, ndonëse e quan si vepër e nxitur nga “mesazhet e politikanëve të Prishtinës të cilat mbjellin urrejtje kundrejt komunitetit serbë”.
Për më tepër, interpretimi i zyrës se ky veprim po bëhet shkak që banorët serbë të jenë “objektiv të huliganëve dhe keqbërësve shqiptarë”, është pretendim tendencioz dhe i pabazuar në fakte konkrete.
Përkundër se në incidentet që ndodhin në këto rajone, asnjëherë nuk janë paraqitur fakte që dëshmojnë se ato, njësoj si ky veprimi në Batushë të Fushë Kosovës, janë të motivuara nga diskursi i politikanëve të Prishtinës të cilat mbjellin urrejtje ndaj komunitetit serbë, Zyra vazhdon të pretendojë se herë-pas-here se këto incidente janë si shkak i këtij diskursi. (shih shembujt e trajtuara nga hibrid.info këtu, këtu dhe këtu)
Analiza:
Zyra për Kosovën në Qeverinë e Serbisë pretendon pa fakte se grabitja e shtëpisë së Dragisha Mishiqit në Batushë të Fushë Kosovës ka ndodhur si shkak i diskursit urrejtës ndaj serbëve të politikanëve të Prishtinës zyrtare.
Ky institucion pretendon në mënyrë tendencioze se ky veprim po bëhet shkak që banorët serb të jenë cak i huliganëve dhe keqbërësve shqiptarë.
Bazuar në metodologjinë e punës, hibrid.info këto pretendime i konsideron si “teori konspirative”.
Vlerësimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
