Portalet informative “Kosova-sot.info” dhe “Botasot.info” kanë publikuar një artikull lidhur me suspendimin e një policeje.
Këto portale në titull nuk tregojnë se në cilin shtet ka ndodhur ky suspendim i kësaj zyrtare policore.
Në artikullin e publikuar në “Botasot.info”, lajmi qartësohet vetëm në përmbajtje, ku thuhet “Një oficere e Policisë Metropolitane, e cila u pezullua pasi krijoi një llogari të OnlyFans dhe e quajti veten ‘Oficer Naughty’, tani është larguar nga Scotland Yard dhe po përballet me një seancë disiplinore.
Ndërsa, në artikullin e publikuar nga “Kosova-sot.info”, përveç në titull, lajmi nuk qartësohet as në përmbajtje, duke lënë vend për keqinforim te lexuesit.
Pas verifikimit të fakteve të kryer nga hibrid.info, është vërtetuar se lajmi është i vjetër, i publikuar në tetor të vitit 2020.
Duke e ditur se këto portale janë të regjistruara në Kosovë (shih këtu dhe këtu) dhe shumicën e lexuesve i kanë shqipfolës (shih këtu dhe këtu), një titull i tillë përgjithësues mund t’i dezinformojë lexuesit, duke i bërë të hamendësojnë se pezullimi i zyrtares policore ka ndodhur në Kosovë.
Vegëzat e artikullit të publikuar në portalet “Kosova-sot.info” dhe “Botasot.info”:
Për ta vërtetuar edhe më shumë faktin se ngjarja ka ndodhur në Londër (Angli), hibrid.info ka gjetur artikullin e publikuar në tabloidin britanik “Daily Mail”. (shih këtu)
Analiza:
Portalet informative “Kosova-sot.info” dhe “Botasot.info” kanë publikuar një artikull të vjetër lidhur me suspendimin e një policeje.
Megjithatë, në titull nuk qartësohet se në cilin shtet ka ndodhur ky suspendim. Artikulli i publikuar në “Botasot.info”, lajmin e qartëson vetëm në përmbajtje, ndërsa “Kosova-sot.info” nuk e bënë të qartë atë.
Pas verifikimit të fakteve, bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
