Një portal informativ me përmbajtje në gjuhën shqipe ka publikuar një artikull me titull “Tragjike! Përmbyset autobuzi plotë me pasagjer, raporohet për viktima dhe të plagosur”.
Pas verifikimit të fakteve, hibrid.info ka vërtetuar se titulli i këtij artikulli është përgjithësues, pasi nuk e sqaron se në cilin shtet ka ndodhur ngjarja, duke lënë të kuptohet se ngjarja ka ndodhur në ndonjë vend shqip-folës, sikurse gjuha e portalit që e ka publikuar.
Lajmi qartësohet vetëm në përmbajtje, më saktësisht në kreun e artikullit, ku thuhet “Një aksident tragjik ka ndodhur në Turqi, ku një autobus ka dalë nga rruga dhe si pasojë është përmbysur, duke shkaktuar 9 viktima dhe 30 të plagosur”.
Vegëza e artikullit të publikuar nga “Sot.com.al”:
Për të vërtetuar edhe më tej faktin se kjo ngjarje ka ndodhur në Turqi, hibrid.info ka gjetur artikullin për ngjarjen e njëjtë të publikuar në mediumin e huaj “United News of India” ku tregohet se kjo ka ndodhur në qytetin e Antalisë në drejtim të Mersinit, në Turqi. (shih këtu)
Analiza:
Aksidenti tragjik i ndodhur në Turqi, është paraqitur pa specifikuar lokacionin në titullin e portalit, Sot.al – duke nënkuptuar mundësinë e ngjarjes në territorin e ndonjërit prej shteteve shqip-folëse në rajon, duke vënë në këtë mënyrë në lajthitje lexuesit.
Në bazë të metodologjisë së punës, hibrid.info këtë artikull e vlerëson si “clickbait”.
Arsyetimi:
” Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.